Fekk svar om rekkverk: – Kan innby til høgare fart
Gunnar Helleland (INP) sitt forslag om rekkverk i staden for grønt rabatt gjennom Dimmelsvik vart ikkje møtt med overdriven entusiasme hjå kommuneleiinga.
Publisert
I kommunestyret spurde Helleland om korleis kommunestyret på enklast mogeleg måte kan påverka reguleringsplanen for Lundsbakkane i Dimmelsvik. Bakgrunnen er at han meiner planforslaget har store manglar når det gjelder trafikksikkerheit. Til dømes ynskjer han at bilvegen og gang/sykkelveg må skiljast med rekkverk i staden for grønt rabatt; både fordi dette er «mykje sikrare for dei mjuke trafikantane», tek mindre plass og krev mindre vedlikehald.
– Ser du til Rogaland og Telemark så byggjer dei gang- og sykkelvegar på denne måten, sa han.
Annonse
Krav om 1,5 meter
Ordførar Vegard Bjørnevik (H) svarte at kommunen i lag med konsulentselskapet Norconsult har vore i tett dialog med vegeigar Vestland fylkeskommune. Spørsmålet om rekkverk har blitt drøfta.
– Det er i utgangspunktet krav om avstand på 1,5 meter mellom vegkant og gang- og sykkelveg. Mindre breidde kan nyttast dersom det vert sett opp rekkverk, men det avheng av kva rekkverk ein nyttar. Ettergivande rekkverk treng til dømes eit rekkverkrom i bakkant. Rekkverk har fleire openberre fordelar, men det er også negative faktorar som må reknast med; rekkverk i seg sjølv er påkøyringsfarleg, særleg for vegfarande på to hjul, og kan ta sikt i avkøyrsler og ved kryssingspunkt. Rekkverk kan også innby til eit høgare fartsnivå, sa Bjørnevik, og la til at ei løysing utan rekkverk også har estetiske fordelar.
– Med slike omsyn halde saman, har ein i planarbeidet konkludert med at breidda på rabatten er ei god løysing for trafikktryggleiken på staden, opplyste ordføraren.
Annonse
Nye vurderingar
Politisk leiing i kommunen får planen til behandling i minst to omgangar. Fyrst skal PTM-utvalet vedta å senda den ut på høyring. Så skal planforslaget reviderast, før det skal til PTM éin gong til. Til slutt har kommunestyret siste ord.
– Viss PTM-utvalet ikkje er nøgd med utgreiingane og løysingane i planforslaget, kan dei til dømes vedta å senda planforslaget attende til administrasjonen med ynske om tilleggsutgreiing eller nye vurderingar. Det same kan kommunestyret gjera når planen kjem dit, understreka Vegard Bjørnevik.
Gunnar Helleland var neppe heilt nøgd med svaret, og tykte ikkje argumentet om at rekkverk inviterer til høgare fart nødvendigvis er korrekt.
– Eg bur på Lundsneset. Der er det grønt rabatt, men folk køyrer heftig likevel, sa han.
