Fekk svar om gangfelt
Synnøve Solbakken har bede Vestland Fylkeskommune om eit gangfelt over fylkesvegen ved Rosendalstunet. No har ho fått svar.
Det er lagt til rette for kryssing av fylkesvegen frå gang- og sykkelstien over til Rosendalstunet. Men noko gangfelt er det ikkje, og Synnøve Solbakken har teke til orde for at det bør koma, sidan mange eldre kryssar den trafikkerte vegen nett der.
No vil Vestland Fylkeskommune ha fartsmåling på strekninga. Dei understrekar at dei ikkje pleier å laga gangfelt i ei 60-sone. Det er heller ikkje vanleg med gangfelt når det er færre enn 25 kryssande i «makstimen».
Annonse
«Forsking viser at risiko for påkøyrsel kan auka i gangfelt som er lite brukt», skriv fylkeskommunen. Men brevet deira utelukkar likevel ikkje at eit gangfelt kan vera bra nett her:
Må bruka skjønn
«Av omsyn til grupper med spesielle behov, kan det likevel vera aktuelt å merka gangfelt sjølv med færre kryssande», står det å lesa i brevet.
Konklusjonen til fylkeskommunen er at dei treng ei fartsmåling før dei vil vurdera tiltak. Synnøve Solbakken avventar resultata frå fartsmålingane, og vurderingane til fylkeskommunen vidare. Ho er oppteken av at her må brukast skjønn, vel så mykje som å telja gåande og køyrande.
Annonse
– Det er mange av dei som bur på Rosendalstunet som kryssar vegen her. Dei er eldre, har gjerne nedsett høyrsel og syn, og treng meir tid enn andre på å kryssa vegen, seier ho.
Solbakken nemner også at det spesielt på godvêrsdagar er mange av dei eldre som er ute og går, kanskje med ein rullator eller rullestol.
– Ein vert gjerne litt mindre merksam når ein kjem opp i åra og har lengre reaksjonstid. Eg håpar fylkeskommunen tek omsyn til dette, og at me får ei god løysing på staden, avsluttar Synnøve Solbakken.
