Fekk SV-sjefen på besøk

– No har me vore sperra inne på kontora våre i halvanna år i pandemien, og det er kjempegodt å koma ut og sjå korleis det er ute og møta folk igjen og sjå korleis dei som gjer jobben ute har det. Sara og eg reiser ikkje berre for å fortelja kva SV meiner om ulike saker, men også for å lytta og få gode innspel, slik me ikkje har kunna fram til no, forklarte Audun Lysbakken, som toppar SV si liste for Hordaland.

Med seg på reisa hadde han Sara Bell, som er på andrekandidaten på lista. Dei kom frå besøk på Bømlo og Stord, og hadde lagt inn ein totimarsstopp i Rosendal på veg vidare til Odda.

Sjukepleiarrekruttering

I Folgefonnsenteret vart dei to toppkandidatane møtt av lokale SV-representantar, og ønskte velkomne av gruppeleiar i kommunestyret Hege Lægreid Røssland. Ho gav ordet raskt vidare til Stine Hatteberg, som var ei av dei som partiet var der for å høyra på.

Hatteberg er plasstillitsvalt for sjukepleiarane i heimeteneste nord, og gjentok for SV-toppane det ho føredrog for formannskapet før sommaren.

– Det går ressursar og tid i å skaffa nok folk og hender til å ha no bemanning. Det gir press på både brukarar og tilsette, og me byrjar å få utfordringar med å dekka dei fagleg behova.

Me har ein desentral kommune som er dyr å driva, og overføringane frå staten er ikkje store nok for oss, så me må spara seks millionar kroner årleg framover, forklarte Hatteberg.

Ho gjorde det klart at sjukepleiar er ei populær utdanning.

– Men nyutdanna vel sjukehus og stadar med større mogelegheiter, både for fagleg utvikling, løn og turnusar, sa Hatteberg ug understreka at rekruttering av sjukepleiarar allereie er ei utfordring for Kvinnherad kommune.

Fordelingspolitikk

– Det Stine Brattetveit fortel er i tråd med det me ynskjer å få gjort noko med, for me må få jamna ut forskjellane mellom fattig og rik og motverka sentraliseringa. Me ynskjer å ønska å auka skattane for dei rike, og bruka desse pengane for å betra kommuneøkonomien til for eksempel Kvinnherad, sa Lysbakken til Grenda etter Hatteberg sitt foredrag.

SV har til valet i år ambisjonar om å få inn to kandidatar frå Hordaland.

– Sara Bell er ei talskvinne for kvinnene i offentleg sektor, og dei fortener nokon på Stortinget som forstår korleis dei har det og kan tala deira sak, la Lysbakken til.

– Me må styrka kommuneøkonomien, for det er eit avgjerande likestillingsspørsmål for distrikts-Norge. Me høyrer likande forteljingar som den Stine Brattetveit fortel i andre offentlege yrke i heile fylket vårt. Me kan ikkje ha ein god velferdsstat viss me ikkje organiserer det slik at det er greitt å jobba der. Det er kvinnene som driftar velferdsstaten, og nett no sparer me oss til fant der, sa Bell.

Skal ein jobba deltid for å spara helsa si, så betyr det låg løn og dårleg pensjon, argumenterte ho.

– Eg trur at om ein skaper gode arbeidsplassar, så vil folk koma dit og jobba. Det er akkurat slik industrien på Vestlandet har fungert i tiår, la Bell til.

SV deler ikkje verklegheitsbiletet til sitjande regjering.

– Me meiner dei har prioritert heilt feil i mange år, og at det er mykje av grunnen til at skilnadane og sentraliseringa i Norge har auke dei siste åtte åra. Dei har prioritert å gjera dei rike rikare, og det er ikkje det samfunnet treng no. No må me sørga for at dei som har mest får bidra litt meir, og så kan me bruka dei pengane til å prioritera fellesskapet, og meir til Kvinnherad kommune så dei kan få meir pengar til fleire i heimesjukepleia og sjukeheimane. Det er fordelingspolitikk i praksis, slutta Lysbakken.

Ynskjer pilotprosjekt

Kvinnherad SV hadde også hyra inn Øystein Skaala frå Havforskingsinstituttet til å fortelja om miljøutfordringane i oppdrettsnæringa.

– Eg trur lukka og semilukka anlegg er vegen å gå for å ta ned miljøavtrykket til oppdrettsbransjen. Det finns fleire typar flytande semilukka anlegg. Slike system vil kunna redusera miljøutfordringane i betydeleg grad. Lus og så vidare er store nok problem at det kan vera vilje til å gjennomføra eit pilotprosjekt i Hardangerfjorden, sa Skaala.

Han peika på at ein slik pilot ville kunna ta for seg storskala testing av alle sider ved slike anlegg, som smittevern, fiskevelferd, utslepp av kjemikaliar og organisk materiale, for å nemna noko.

– Eg trur også at tida er inne til å sjå på teknologiutviking på det feltet, la havforskaren til.

– Utviklinga er ikkje til å bli glad av, meinte Audun Lysbakken, som spurde om Skaala hadde nokon tankar kring finansiering av ein slik pilot.

– Oljeleiting og havvind er statleg støtta, men eg trur ikkje det trengs stor støtte her. Det er ein sterk industri med sterk innflytelse, og dei må vera med på dette, svarte Skaala

– Me skal vera med på å få til ein pilot, lova Lysbakken.