Fekk ny lekkasje – måtte flytta butikken midt i julestria
– Det er no me har dei viktigaste salsdagane våre, så me må koma oss opp og gå i nytt lokale snarast råd, seier Annette Stråbø Melkeraaen i Berg Gull & Sølv.
Publisert
Sist oppdatert
Gode råd vart dyre då gullforhandlaren Berg Gull & Sølv torsdag kom til ny lekkasje i lokala sine i Rosendal.
– Dette er femte gongen sidan september at me har lekkasje. Men denne gongen er det knapt eit døgn sidan sist, sukkar Annette Stråbø Melkeraaen medan ho og hennar kollegaer Annelin Johannessen og Alida Naterstad Solheim jobbar på for å få flytta varebehaldninga over i nye, lånte lokale i Varehuset Rosendal.
Annonse
– Dette er veldig viktige dagar for oss, og det er der for kundane våre også. Såleis er det eigentleg den verste tida det kunne skje på. Me reknar med å vera oppe og gå snarast råd, og har fått mykje god berehjelp av mange for å få koma oss raskast mogeleg på plass. Me har vore redde for at det skal setja seg lukt på puter og inventar, så me prøver å jobba raskast råd med flyttinga, seier Melkeraaen.
Me er utruleg takksame for all hjelpa me har fått på kort varsel, ikkje minst for at Kristi Hatteberg hos Sport1 Rosendal lånar vekk eit lokale til oss, slik at me kan koma i mål med julesalet, seier Melkeraaen, som også rettar ei takk til Gunn Kleppe hos Rosenform og Hans Martin Kårstad og Igor Wojcik frå Kvinnherad Elektro for hjelpa.
