Fekk lekkasje på bygdehuset

Valedamene har gjennom fleire år med dugnadsinnsats vølt og oppgradert Bygdahuset på Valen til å bli eit skikkeleg hus for bygda. Tysdag vart det oppdaga lekkasje på kjøkkenet, med betydelege vasskadar i to etasjar som konsekvens.

– Det er ikkje berre overflatevatn, det har gått gjennom veggar og tak. Det er hovudetasjen og kjellaren det har gått utover. Me har hatt lekkasje her før, men då var me i ein annan situasjon, og kom heller heldig i frå det, seier leiar for Valedamene Siri Rusten til Grenda.

Forsikring

– Det er kjedeleg at det kjem no, for me har nett hatt straumbrot på bygget. Eg syns me får litt for mange karamellar inn i mellom no, legg Rusten til.

Då alarmen gjekk om lekkasjen, stupte til folk for å hjelpa.

– Kvinnherad brann og redning kom også, og sa det var omtrent som eit Amish-samfunn då dei kom. Folk stiller opp for bygdehuset, og stilte med avfuktarar og vifter, og me fekk gode tips frå brann og redning om korleis me burde gjera det. Ein føler at det er eit lokalsamfunn som verkar når det er slik, seier Valedame-leiaren.

Hendingsforløpet er ikkje heilt klart for Valedamene enno.

– Me veit at det var ein spring som stod på oppe på kjøkkenet, og så er vatnet til steameren kopla til denne. Utover det har eg ikkje detaljkunnskap, og kjem no til å fokusera på å fiksa bygdahuset, heller enn å dvela for mykje ved årsak, seier Rusten.

Det er gjort mykje med huset etter at dei etablerte Valedamene i 2018, blant anna fiksa kjøkkenet, malt festsalen, laga trimrom, bad og nytt tak i kjellaren.

– Me har forsikring, og Reco kjem for å sjå på skadane no i dag (onsdag). Me håper verkeleg at me får huset tilbake til staden det var i når forsikringsselskapet har gjort sitt arbeid, men det er veldig kjedeleg og trist å oppleva dette, sluttar Siri Rusten.