Fekk ikkje vita kostnaden på vegutbetring

Øyvind Hardeland (Ap) undrar kva arbeidet med strekninga Folgefonntunnelen-Årsnes har kosta så langt. Men svaret får han ikkje vita.

Det var i kommunestyret at Hardeland fremja spørsmålet om prisen på vegutbetringa i Mauranger til no, dette inkludert planlegging og konsulentbruk. Ordførar Hans Inge Myrvold (Sp) opplyste at det er sett av 350 millionar kroner til Krokatunnelen, samt 100 mill. utbetring av vegen elles. Dette målt i 2018-kroner. Men sjølve rekneskapen kunne han ikkje røpa.

– Fylket går ikkje ut med detaljert prosjektrekneskap på noverande tidspunkt, fortalde Myrvold.

Hardeland var ikkje nøgd med svaret.

– Vi må sjå kvarandre i korta, kva kostar dette? Det er innbyggjarane i Kvinnherad som betaler dette, meldte han.