Fekk ikkje støtte til tilflyttarprosjekt
Hatlestrand bygdalag vil jobba for å få fleire tilflyttarar til bygda. Men søknaden om midlar til ei eiga nettside fekk avslag i styret for næringsfondet.
Føremålet med nettsida skulle vera marknadsføring og informasjonsbygging. Draumen er å få fleire til å busetje seg på Hatlestrand, noko som igjen kan føra til ny aktivitet innan arbeidsplassar, bustader og tomteutvikling. Prisen for ei nettside vert estimert til 10-15.000 kroner eks. moms.
Men rådmannen innstilte på å avslå søknaden, og meiner tiltaket er i grenseland for vedtektene til fondet. Politikarane verka derimot til å vera positive, heilt til rådmannen kunne opplysa at fondet ikkje har meir pengar for 2017.
Artikkelen held fram under annonsen.
– Eg vil oppmoda rådmannen til å sjå om han kan finna nokre pengar til Hatlestrand. Dei gjer jo som vi ynskjer og jobbar for å auka folketalet, kommenterte Leif Sverre Enes (H).
Hans Inge Myrvold (Sp) viste til at Husnes vekst tidlegare hadde fått støtte til å laga ny nettside (kr 30.000 i januar 2016).
– Så fondet har gitt pengar til liknande prosjekt, sa han.
Men grunna pengemangelen vart innstillinga samrøystes vedteke.