Fekk ikkje røysta mot alle budsjetta: – Vi lærer

Under budsjettdebatten i Kommunestyret før jul, stal Industri- og Næringspartiet ein del av merksemda. Partiet hadde ikkje med seg eit eige budsjettforslag, noko som heller ikkje er noko krav og såleis fullt akseptabelt. Partiet var dessutan ikkje invitert til forhandlingar med koalisjonen om deira framlegg, noko Heidi Bolette Jakobsen vonar endrar seg til neste gong.

– Det er lov å ynska seg ting no rundt juletider, smilte ho.

Men det vart temperatur i salen då ho fortsette innlegget sitt.

– Vi har konkludert med, kanskje litt kontroversielt, at vi ikkje kjem til å stemma for nokon budsjett i dag. Vi har diskutert litt fram og tilbake, også om det er lov å stemma nei. Men slik det ligg an no, ser det ut for at det er eit val vi kan ta, vurderte ho.

Dette fekk varaordførar Thea Vaage (Ap) til å reagera.

– Eg synest jo det er litt spesielt at ein ikkje lagar sitt eige budsjettforslag, og heller ikkje kjem til å stemma for andre sitt. Det betyr i praksis at INP meiner at vi ikkje treng noko budsjett i Kvinnherad kommune, og det synest eg ikkje er ein god måte å styra kommunen på, kommenterte ho.

Jurist

Ordførar Vegard Bjørnevik (H) valde å stoppa møtet då, for det var naudsynt å få avklart med jurist om INP faktisk kunne avvisa alle budsjettalternativa. Etter ein lengre pause, var konklusjonen tydeleg på at det kunne partiet ikkje. Kommunen er nemleg pliktig å ha eit budsjett.

– Det er godt med gode diskusjonar, og vi lærer. Hadde vi hatt eit eige budsjett, så hadde vi stått for det og teke eit aktivt val. No må vi i staden ta eit val på eit av dei andre forslaga. Vi har alltid ein plan B, og ser at vi ikkje kan få i pose og sekk, sa Heidi Bolette Jakobsen på talarstolen då møtet starta igjen.

Ved røystinga gjekk INP inn for koalisjonen sitt forslag.

Grenda spurde Jakobsen kvifor INP i utgangspunktet ikkje ville støtta nokon av forslaga.

– Godt spørsmål! Vi burde sikkert ha laga eige budsjett, og gjer truleg det til neste år, svarte ho.