Fekk godkjenning av Finanstilsynet
Tysnes Sparebank og Haugesund Sparebank skal som kjent fusjonera. No har dei fått godkjenning frå Finanstilsynet, samstundes som Haugesund Sparebank er notert på Oslo Børs.
Publisert
Sist oppdatert
Det var den 5. juli leiinga i Haugesund Sparebank tok turen til Oslo Børs for å slå i klokka som markerer at banken no er notert på børsen.
«Ein historisk dag! Den planlagde samanslåinga med Tysnes Sparebank gjer oss større og enda meir solide. Tysnes Sparebank er allereie på Euronext. Det har derfor vore viktig for Haugesund Sparebank, som overtakande bank, å ta steget opp eit hakk med å notera banken vår på hovudbørsen i forkant av samanslåinga», skriv banken på si heimeside.
Annonse
Det vert også opplyst at banken fekk eit årsresultat i 2023 på 154,8 millionar kroner etter skatt, noko som er deira beste gjennom tidene.
Tysnes Sparebank noterte seg for eit årsresultat på 34,5 millionar kroner. Det er noko svakare enn i 2022, då overskotet enda på 39,9 millionar.
Namnet
Tidleg i juli vart det også sendt ut børsmelding om at samanslåinga har fått alle nødvendige godkjenningar av Finanstilsynet. Ein ting som står att, er spørsmålet om kva den samanslegne banken skal heita.
Annonse
– Vi startar no ein prosess for å finna eit nytt namn på den samanslegne banken. Vi ynskjer eit namn som synleggjer ambisjonane, og som signaliserer at banken er noko meir enn berre Haugesund og Tysnes til saman – eit godt namn som reflekterer vår ambisjon om ytterlegare vekst, seier banksjef Dag Sandstå til nettavisa Bankshift.no.
Fusjonen skal etter planen bli gjennomført kring 1. november.
