Fekk forlenga frist til busetjing – har spennande planar

Det føreligg spennande planar for den gamle garden til Anfinn Bondhus i Rosendal.

Hausten 2016 fekk Øystein Eriksen konsesjon til å overta eigedomen til Anfinn Bondhus ved prestegarden i Rosendal. Han søkte då om at det kunne gå fem år før han busette seg der, men forvaltningsutvalet stoppa på tre pluss eitt år.

Eriksen har framleis ikkje busett seg der. No har han søkt om utsetjing i tre år, til 24. januar 2024. Forvaltningsutvalet vedtok i staden samrøystes å setja datoen til 1. januar 2023, noko som var i samsvar med innstillinga til kommunedirektøren. Eriksen må dessutan bu der i minst fem år.

I følgje søknaden har han framleis planar om å flytta til eigedomen, og er i gang med å planleggja å utvikla og restaurera fleire bygningar på garden saman med Sunnhordland museum. Eriksen ynskjer òg å byggja nytt bustadhus, og har kome med innspel til kommuneplanprosessen med tanke på regulering av 3 dekar til bustadføremål. Han har elles avtale om drift av jorda fram til 2028.