Fekk endeleg spela heimekamp
Laurdag var det full rulle i Storstova då Kvinnherad Handballklubb var med og arrangerte cuphelg for Rema 1000 sin Hjarteliga.
– Hjarteligaen er ein eigen liga for dei som har ei eller annan utfordring, men utan tilbod andre stader, og dei reiser rundt i Vestland og deltar på cuphelger. Av og til blir det også både overnatting og bankettar på kveldane. Dette er fyrste gong på mange år at me arrangerer det her i kommunen, så det er veldig kjekt, sa styremedlem i Kvinnherad Handballklubb Janniche Haugland.
På strak arm
Annonse
Med på denne cuphelga er det fem lag, det sjette laget som skulle vera med måtte diverre trekkja seg like før. Men endringar i kampoppsett til trass, då Grenda tok turen innom hallen var turneringa allereie godt i gong.
Kvinnherad har eitt lag med i ligaen, KHK Foreina, som alle var klare og gira før neste kamp.
– Me er veldig klare for kamp. Det er kjempegøy, også vann me forgje kamp, sa Martin, ein av spelarane på laget.
Lagkamerat Ulrikke sa seg einig.
Annonse
– Ja, det er veldig gøy. Me har trena mykje, sa ho noko sjenert.
Ein av trenarane, Katrine Hvidvold, kunne også fortelje at dei måtte låna vekk ein spelar til det andre laget under førre kamp.
– Laget frå Stord var ein spelar for få, så me lånte vekk ein. Det tykte dei var veldig rart, at dei plutseleg skulle spela mot ein av sine eigne. Men det gjekk veldig fint, dei tok utfordringa på strak arm og vart éin erfaring rikare, fortalde ho smilande.
Hvidvold la heller ikkje skjul på at det var ekstra kjekt med heimekamp no, etter fleire år med bortekampar.
– Me har éi kamphelg i månaden, og som regel må me reisa til Bergensområdet. Sist heimekamp var i januar 2019, så det er ei stund sidan. Det som er så keisamt med bortekampar er at ikkje alle kan vera med. Alle har ulike utfordringar, og for nokre er det ikkje mogeleg å reisa så langt, forklarte Hvidvold.
– Før korona så pleidde me å ha annakvart år der me og Stord veksla på å ha heimekampar. Det har teke litt ekstra tid før me har kome tilbake dit, men no reknar me med at me skal få til det igjen. Det som er ekstra kjekt med heimekampar er at då kan alle få lov til å bli med, la ho til.
Annonse
Lavterskeltilbod
I hjarteligaen spelar alle på same lag, uavhengig av både kjøn og alder. Det er derimot ulike reglar som ser an nivået og ferdigheitene til kvar enkelt spelar.
– Dersom det til dømes er ein spelar som ein veit kan forstå trestegsregelen, så blir han eller ho dømt for brot på det i kampane. Men dersom det er ein spelar som ein ikkje kan forventa at forstår den regelen, så blir dei ikkje dømt for det. Alle spelarane blir møtt på sitt nivå, sa Hvidvold.
Trenaren forklarte at KHK Foreina og Hjarteligaen er eit lavterskeltilbod for alle som ikkje føler dei passar inn i ordinær idrett.
– Me trenar éi gong i veka og ynskjer gjerne å få fleire spelarar med på laget. Så dersom du ikkje føler at du passar inn i ordinær idrett, så kan du koma og spela med oss, smiler Hvidvold.
