Fekk dispensasjon til gokartbane: – Eit stort lyspunkt for oss som jobbar med dette

Eit samrøystes forvaltningsutval vedtok i sitt møte den 2. juni å gje Kvinnherad Motorsportklubb dispensasjon til å bygga ein liten del av den planlagde gokartbanen i Matre inn i friluftsområde.

– Det er vi veldig glade for. Det betyr at vi kan gå skikkeleg i gang med planane våre for anlegget. Men det er alltid eit men, seier leiar Torstein Nupen i Kvinnherad Motorsportklubb.

Neste steg på vegen

For sjølv om dispensasjonen vart einstemmig vedteken i forvaltningsutvalet, har fylkesmannen framleis tre veker på å koma med sine merknadar.

– Vi kjem nok til å halda oss litt rolege fram til desse tre vekene er gått. Men før dispensasjonen var på plass så har alle planane stått på vent, no kan vi i alle fall byrja i det stille med å få inn dei tilrådingane og krava som motorsportforbundet og bilsportforbundet stiller til ein slik bane, seier Nupen.

I godt over tre år har klubben jobba med å utvikla anlegget sitt oppe på Fuglatjørn. At dispensasjonen no er plass betyr også at draumen om å få bygd ein gokartbane i tilknyting til dagens knattekrossbane tek eit stort steg på vegen mot å bli verkelegheit.

– Det gjer det. No kan vi involvera dei ulike forbunda og jobba med å få godkjenningar til dei ulike sikkerheitssonene og slikt. Vi har ikkje ynskt å ta kontakt med dei før vi har fått lov til å byggja. Så vi går no ei spennande tid i møte. Dette er verkeleg eit lyspunkt for oss som driv på med dette, seier Nupen.

Vil løfta allereie stor interesse

Sjølv om banen hovudsakeleg vert bygd for å gje eit tilbod til kommunen sine motorsportinteresserte, vil klubben også ha eit stort fokus på å få på plass fleire bruksområde på banen.

– Dette er noko mange i kommunen har sakna og etterspurt lenge, noko vi ser på talet personar som reiser for å køyra gokart i Haugesund. Med ein sånn bane så får vi plutseleg på plass eit alternativt tilbod som kommunen ikkje har i dag. Men i tillegg så ynskjer vi å utnytta dei moglegheitene som er, til dømes ved å leiga banen ut til køyreskulane som kan bruka den til køyreteknikk og anna. Det skal bli eit anlegg som flest mogleg kan bruka, seier Nupen.

Her kjem Liam (8) i hundre over asfalten

For motorsportmiljøet i kommunen, som Nupen trur er blant dei største i landet sett i samanheng med innbyggjartalet, vil det bli eit gigantisk løft.

– Vi har ikkje hatt noko slikt som dette før, så eg både trur og håpar at miljøet vil bli større. No har vi teke første steg på vegen, og vi gler oss veldig til det som kjem og ser veldig lyst på det her. Det er noko vi verkeleg har trua på, sluttar Nupen.