Feira ti år med ny barnehage
Det er ti år sidan den nybygde, private barnehagen på Valen vart opna. Fredag vart det feira på skikkeleg vis.
Publisert
Det var kanskje berre snorklyppet frå ordføraren som mangla, men det ville uansett vore ti år på overtid. Ordføraren fekk likevel lov til å delta, og overleverte helsing, skryt til dei tilsette og gåvekort til den tolmodige barneflokken som sat i amfiet. Ho fekk også vera publikum når barna skulle ha generalprøve på korsynginga, som skulle imponera foreldre og besteforeldre seinare på dagen.
– Viktig jobb
Annonse
– For ti år sidan blei denne flotte bygningen vår reist, etter at dei reiv den gamle som stod her, fortalte barnehageleiar Kari Bakken Teigen til dei rundt 30 barna som var samla i amfiet.
Før ho tok ordet, hadde barnehagesjefen gjort ein entré for historiebøkene, saman med kollegaane Kristi Saghaug og Vanja Eikeland. Dei showa og skøya på eit slikt vis at dei fanga merksemda til barna, ein kompetanse barnehagetilsette truleg har eit høgare nivå på enn dei fleste andre.
– Me har øvd i ei veke allereie, og no er me klare til å ta den siste øvinga, sa Saghaug til ein songklar barneflokk.
«Happy Birthday», «Hjulene på bussen» og «Apekatten hoppa i ei seng» var repertoaret som skulle finpussast til konserten seinare på dagen. Det blei gjort på eit vis som imponerte både ordførar Hilde Enstad og barnehagefagleg rådgjevar Signy Aarre Prestnes.
Annonse
Friluftsbarnehage
Eventus er den tredje eigaren som har styrt Valen barnehage sidan barnehagen vart privat og nybygd, og dei er no ein friluftsbarnehage.
– Me ville ha litt aktivitet i starten av dagen, og ettersom me er ein friluftsbarnehage, så ville me ha dei aktivitetane ute. Me har fått til kjekke aktivitetar der me bruker oss av naturmateriale, som til dømes å kasta kastanjenøtter i bøtte, kasta svamp på ein vaksen og veva med naturmateriale, fortel Kari Bakken Teigen til Grenda.
Lunsjen vart også laga og eten ute, der fiskeburgarar sponsa av Hjønnevåg stod på menyen
– Me vel å grilla mat ute, og opptatte av sunn mat, legg Teigen til.
Bursdag er likevel ikkje bursdag utan noko søtt, og seinare på dagen kom foreldra og var med på kake- og bollefest. Dei fekk også servert den skikkelege konserten, ikkje noko generalprøve, som den ordføraren fekk vera med på.
Annonse
Finteljinga til Teigen klokkar barnehagen inn på 48 barn og 15 tilsette ved Eventus Valen barnehage, som alle hadde ein storvegs dag under feiringa på fredag.
