Feira seg sjølv med raud løpar og kunstutstilling

Prosjektet skulle vera ei feiring av dei sjølve, før det heile så skulle bli avduka på avslutningsfesten. Prosjektet er også noko som skulekameratane har jobba med heilt sidan barnehageåret starta, og dei vaksne har jobba bevisst for å skapa eit godt samhald i gruppa gjennom ei rekkje ulike aktivitetar.

Tema venskap

– Me byrja allereie fyrste veka, då hadde me ei uteveke der me blei betre kjende med kvarandre, og det har me også fortsett med gjennom heile året. Me likar å farta, så me finn på ulike ting. Blant anna har me vore på besøk heime hjå alle i gruppa, i tillegg har me reist til både Husnes og Rosendal, fortalde dei vaksne.

– Her i barnehagen ha me to grupper, og tre dagar i veka så har alle skulekameratane vore i lag. Det har me merka godt på gruppa. Det har skapt betre samhald, dei er blitt tryggare på kvarandre og det har skap eit fellesskap som alle er ein del av. Alle har nokon og kjenner seg inkludert, fortsette dei.

På alle turane sine har dei også jobba med avslutningsutstillinga ved å leita etter hjarter. Temaet for utstillinga er nemleg venskap, og på alle turane sine har dei funne hjarter ute i naturen.

I tillegg har skulekameratane laga både keramikkfigurar, handavstøypingar og måleri.

– Alle figurane dei har laga har fått namn, og det har dei kome på heilt sjølve, forklarte dei vaksne.

Raud løpar

Ungane sjølve hadde full kontroll på temaet og kva som er ein god ven.

– Du skal vera snill, og ikkje slå, var det ein gut som sa, før fleire heiv seg med og nemnde både sparking og biting av ting som heller ikkje er lov å gjera.

– Du skal hjelpa med ting som er vanskelege og sei fine ting til kvarandre, var det nokon andre som fortalde.

Vidare kom formaningane om kva ein god ven er som perler på ei snor:

– Du skal gje ein klem og hjelpa dei opp igjen når dei detter.

– Du skal trøyste og vera med dei når dei leiker åleine.

Bladfyken var på besøk ikkje så lenge før det heile skulle opnast offisielt, og tida der foreldra skulle kome nærmar seg med stormskritt. Innan den tid var det fleire ting som måtte på plass.

– Det blir både raud løpar og bollar, i tillegg til at alle borna skal få utdelt kvar si rose og sin eigen perm. Me vaksne har også laga til film med bilete frå året som har gått, som ingen av ungane har fått sjå endå. Borna skal også syngja ein song, «Eg skal byggja meg ein gård», fortel dei.

Før den ærefulle seremonien tok til, fekk underteikna æra av å få høyra på generalprøven av songen, og det var tydeleg at dei hadde øvd mykje. Framføringa sat som eit skot og sjarmerte i senk gjennom alle fire versa.