Feira 30 år i eigen barnehage

Barnehagen i Ølve og på Hatlestrand er kvar si avdeling i same barnehage, sjølv om det er ei mil mellom dei. Viviann Tuften er leiar for dei begge, og ho fekk ein travel dag i to identiske barnehagebygg.

– Dei er bygd av same firma. Barnehagen på Hatlestrand opna i september 1993. Då dei var ferdige der, gauv dei laus på bygget i Ølve, som stod klart slutten av november same år, fortel Tuften.

30 år på post

Om ikkje Tuften var der til å sjå opninga med eigne auge, så var Irene Håvik til stades.

Ho har jobba i barnehagen i Ølve sidan dei tok han i bruk.

– Det har vore 30 kjekke og innhaldsrike år, med opp- og nedturar. Ein har vore truga med nedlegging, og me er glade for at ein klarte å halda det, og iallfall når me ser det som er no, seier Irene om barnehagen som har gått frå tre til 11 barn i løpet av på to år.

– Det låg til rette for auke igjen, med byggefelt og arbeidsplass. Ein vil jo ha levande bygder i Kvinnherad. Eg vil senda ekstra varme tankar til dei som hadde trua på oss, for elles hadde me ikkje feira 30-årsdagen, seier Håvik til Grenda.

For det vart sjølvsagt feira bursdag, med både pølse, fiskefingrar, saft og kake. Jarle Håbrekke Håvik (4), Trym Håvik Eikeland (4), Astrid Skutlaberg Johansen (4), Selma Ulvenes (4), Brage Revne (3) og Thale Emile Helvik (3, men veldig snart 4) tok for seg av matfatet med hjartans lyst.

– Det er veldig kjekt å vera i barnehagen! Me får leika, forklarer Jarle og Trym entusiastisk til Grenda.

Gåve

Det passar seg å ha med gåve til bursdagsbarn, og då Viviann Tuften bar ut ein velvaksen pakke, steig entusiasmen hos Trym, Jarle og resten av barnehagebarna endå nokre hakk. Ein kraftig kjøkkenmaskin skjulte seg under innpakkingspapiret, kanskje aller mest til glede for dei tilsette i barnehagen.

– No slepp me å laga kake for hand. Kanskje me kan byrja med brødbakst også no, undra Elisabeth Prestnes Fosså.

Også på Hatlestrand vart det feira. Ein skal ikkje gjera forskjell på folk eller barnehagar, så også denne barnehagen fekk ein skinande ny kjøkkenmaskin.

Der Ølve har meir enn dobla barnetalet, har det vore meir stabilt på Hatlestrand, med 14 totalt no for tida. Det inkluderer eitt barn frå Varaldsøy, noko som kjem til å stiga til tre etter nyttår.

– Eigentleg er det tre avdelingar, men sidan avdelinga på Varaldsøy er steng, er me i praksis to. Men me har tre tilsette frå Varaldsøy som pendlar til Hatlestrand for å jobba, forklarer Lilli Britt Urheim som er verksemdsleiar for Hatlestrand oppvekstsenter som barnehagen soknar til.

Bursdagsfeiringa avgrensa seg ikkje berre til barna som går i barnehagen no. Torsdag kveld var det også opne dørar i barnehagane, og fritt fram for alle til å koma innom.