FAU vil ha skikkeleg prosess

– Me har vore veldig usikre på framtida til skulen, og uvissa gneg på alle involverte. Me fekk i møte 25. januar lovnad frå ordføraren er at det blir ikkje nedlegging til hausten. Då har me litt tid på oss til å finna ut av ting, seier Signe Bondhus-Jensen i FAU ved Mauranger skule.

Etter å ha skumma seg gjennom det planen seier om Mauranger skule, kommenterer ho at det ikkje står ikkje eksplisitt noko år administrasjonen ynskjer å leggja ned Mauranger.

– Med lovnaden frå ordføraren forventar me minst eitt år til. Men eg blir betenkt nå det ikkje står spesifisert år, medan innsparinga står opplista under økonomidelen av saksutgreiinga. Elevane våre går på Mauranger skule, og me vil at dei skal gjera det 100 prosent. Me håper å få ei god avslutning, så får me gå ned med flagget til topps. Lærarane er gode på å driva ein liten skule, slår ho fast.

Ho peikar også på at valfridom til å velja kva skule dei skal gå på må gjelda begge vegar.

– Viss ein flyttar krinsgrensa, så må dei som ynskjer å reisa til Rosendal, få høve til det. I saksutgreiinga står det at «I møte med føresette på skulen, seier føresette at dei er usamde seg imellom om kva som er den beste løysinga i framtida for borna deira. Om lag halvparten vil ved ei eventuell nedlegging til Rosendal skule, medan den andre halvparten ynskjer seg til Odda».

Her vil eg berre få skyta inn at foreldra er samde om at valfridom er den beste løysinga for Mauranger. Her høyrest det litt ut som om me meiner ulike ting. Det er ingen foreldre som tar til orde for å tvinga alle elevane den eine eller andre retninga. Foreldregruppa er slik sett heilt samstemde om kva som er den beste løysinga ved ei eventuell nedlegging av Mauranger skule, og det er ein langsiktig avtale med Ullensvang om at ein får velja. Det gjeld uansett kor kommunane vel å leggja krinsgrensa, sluttar ho.