Fargerik fest for mangfald og kjærleik
Laurdag føremiddag var det duka for Kvinnherad sitt fjerde, og Uskedalen sitt aller fyrste, Pride-arrangement. Det vart både fargerikt, folkeleg og feststemt.
Fleire valde å ta turen til Uskedalen for å vera med å feira både mangfald og kjærleik, og for å syna si støtte til LHBT-miljøet og ei sak som engasjerer mange.
– Eg tillet meg sjølv å seia at eg er ein ganske OK person. Eg er ein god, kjærleg og støttande ven, kjærast, son, kollega og nabo. Likevel er det mange stader ikkje berre ulovleg å vera meg, men også farleg å vera meg, slik starta Aleksander Papas sin appell under arrangementet laurdag.
Annonse
Sinne og vantru
– Det er bra med markeringar, også her ute i bygda. Kanskje spesielt her ute i bygda. Likevel er det ikkje nok, fleire må engasjera seg, spesielt må politikarane koma på banen, seier Papas til dei frammøtte, som stundom kjem med eit og anna engasjert utrop for å syna si einigheit.
Vidare trakk han blant anna fram skytinga i Oslo for eitt år sidan. Han uttrykte både sinne og vantru over at nokon vel å skyta andre eine og åleine fordi dei elskar nokon. Han understreka også kor viktig det er, samtidig som han vedkjende kor vanskeleg det kan vera, å ta kampen; i samtale med naboen, på pauserommet på jobb, i bedehusmiljøet, eller på fest med vener og familie.
– Men eg er motivert, kampklar og stolt. Og me blir fleire! avslutta han.
Annonse
Då Grenda sin utsende journalist traff på Papas etter paraden tykte han at det var eit fantastisk oppmøte.
– Det er kanskje ikkje det største oppmøte og den største Pride-paraden som finst, men det er heller ikkje viktig. Det viktige er at dette blir markert også utanfor det store byane. Noko av det som gjer det ekstra bra er at dette er eit familiearrangement, her ser ein både familiar, eldre og unge. Det er veldig fint, seier Papas.
Då paraden var klar til avgang fekk Trond Olsen med sin veterantraktor æra av å køyra i front, med musikkanlegget bak på pallegaflane og ei fargerik og feststemt folkemengd dansande etter.
Tilbakemeldingar
– Arrangementet vart nydeleg fint. Det vart ein festdag, ispedd glede, alvor og nokre tårer. Me hadde eit godt samarbeid med både prosjektleiar i Festidalen Jostein Sydnes og politiet. Og veterantraktoren til Trond Olsen i front av paraden var heilt perfekt! fortel dagleg leiar for Romsleg Jorun Larsen til Grenda.
– Det var mange som kom og mange som gav uttrykk for at det er viktig å markera Pride i Kvinnherad. I tillegg vart me møtt med enormt mykje støtte, både i forkant og etterkant av arrangementet. Når det er slike tilbakemeldingar ein får, og ein ser og opplever at det er så mange som faktisk heier på oss, er det veldig meiningsfullt å halda på, understrekar Larsen.
Annonse
Larsen er klar på at det er éi kjensle som sit att etter helga.
– Kjensla som dominerer er enorm takksemd. Enorm takksemd! seier Larsen.
– Eg er elles glad for at det vart sett litt fokus på minoritetsgrupper innad i det skeive miljøet. For Romsleg jobbar jo for å synleggjera og inkludera alle desse gruppene, ikkje berre frå LHBT-miljøet, men òg meir generelt. Me har fleire spanande planar, som omfattar dette meir generelle mangfaldet, i støypeskeia, avsluttar Romsleg-leiaren litt kryptisk.
