Får tryggare skulevegar og nærmiljø
Regjeringa meiner at fleire barn burde gå eller sykla til skulen, men til det treng dei tryggare skulevegar. No får Kvinnherad tilskot til to slike prosjekt.
Regjeringa har til saman gjeve 23,6 millionar kroner til 64 ulike tiltak til kommunar over heile landet. Av dei får Vestland til saman delt ut 3,95 millionar kroner til tolv prosjekt. To av desse prosjekta ligg i Kvinnherad.
Det fyrste tiltaket i Kvinnherad gjeld intensivbelysing av kryssingspunkt i Opsangervegen, noko som har blitt tildelt 60.000 kroner. Det andre tiltaket har fått tildelt 110.000 kroner, og gjeld belysning ved veg og kryss ved Rosendal ungdomsskule og ballbingen/apejungelen like ved.
Annonse
Dette kjem det fram i ei pressemelding frå samferdselsdepartementet.
Formålet med ordninga er at trafikksikkerheit for barn og unge skal bli betre gjennom å inspirera til lokalt arbeid for tryggare skulevegar og nærmiljø.
– Pilene peikar dessverre feil veg når det gjeld talet på omkomne barn i trafikken. I fjor mista me sju barn under 16 år i trafikkulykker på norske vegar. Til samanlikning omkom to barn året før, medan det i 2019 ikkje omkom nokon barn i trafikken. Dette syner at desse prosjekta er viktige og at me framleis må prioritera trafikksikringsarbeidet, seier samferdselsministeren i pressemeldinga.
