Får straumstøtte til mars 2023: – Dette var vinn eller forsvinn for oss
Forslaget til forskrift om vidareføring av straumstøtta til næringa har vore ute på høyring, og ny mellombels forskrift for perioden april 2022-mars 2023 vil bli fastsett før sommaren.
Publisert
Sist oppdatert
Forskrifta vidarefører straumstøtta til jordbruksforetak og veksthus ut mars 2023. Ordninga inkluderer blomsterproduksjon og vatningslag. Dette skriv regjeringa i ei pressemelding.
Landbruks- og matminister Sandra Borch (Sp) er svært nøgd med å kunne vidareføre straumstøtteordninga, og meiner dei har fått mange gode innspel i høyringsrunden.
Annonse
– For meg er det viktig å lytta til næringa, og me har difor landa på at det er riktig å vidareføra støtta til blomeproduksjon i veksthus. Veksthusproduksjon er svært straumkrevjande, og næringa har opplevd store utfordringar som følgje av dei auka straumprisane. For regjeringa er det viktig å oppretthalda norsk produksjon. Blomar og prydvekster er ein viktig del av økonomien og grøntproduksjonen i veksthusnæringa, seier ho.
Uheldig
Dette har mellom anna innspelet frå Statsforvaltaren i Vestland bidrege til å setja fingen på i høyringsrunden:
«Me ser i forslaget til ny forskrift, §4. Vilkår for støtte, at det berre blir gitt straumstøtte til dyrking av vekstar til humant konsum i veksthus. Det gjer at blomster- og planteskule fell utanfor ordninga, noko vi meiner er uheldig.»
Annonse
Forlenginga av straumstøtteordninga kan såleis vera med på å sikra årets lokale produksjon av julestjerner, utan at produsentane går i tap slik Fredheim Gartneri gjorde grunna dei høge straumprisane i 2021.
Vinn eller forsvinn
Terje Hus meiner difor det er ein svært gledeleg nyheit å få, når Grenda ringjer i samband med den glade bodskapen.
– Då er julestjernene redda. Hadde me ikkje fått beskjed om dette denne veka hadde me avbestilt julestjernene, seier han, før alvoret tek han:
– Dette var vinn eller forsvinn for oss. Hadde ikkje straumstøtta blitt forlenga hadde me ikkje kunna fortsetta. Men no er me redda fram til våren 2023. Men dersom straumprisane held fram å vera høge, kan det sjå skummelt ut for hausten 2023, medgir han.
Hus er glad for at dei no er trygga, iallfall fram til mars neste år, og gler seg også over at lovnaden som var kome viste seg å stemma. Det betyr at dei vil få straumstøtte også for april og mai i år, noko som vil koma svært godt med for gartneriet.
