Får skryt av sjefen: – Sky is the limit for Synne

Lyn sette ein stoppar for Åsane-jentene sin Toppserie-draum etter å ha slått dei 1-0 på Åsane Arena søndag, og 3-1 totalt over to playoffkampar. Likevel klarer Åsane-trenar Eirik Fjeldstad å sjå positivt på det.

– Vi ser at det ikkje er sånn kjempelangt opp. Det er tett mellom toppen av 1. divisjon og botn av Toppserien. Det tek vi med oss. Vi har eit godt fundament å byggja vidare på, og vi har mange gode fotballspelarar, seier Fjeldstad etter kampen.

Enormt potensiale

Ei av dei gode spelarane Fjeldstad har tilgjengeleg, er Halsnøy-jenta Synne Eide Bjørnebøle. Ei jente som får mykje skryt av damelagssjefen.

– Sky is the limit for Synne. Ho har eit enormt potensiale. Vi må byggja litt musklar på ho, sånn at ho står endå betre i duellane. Ho har enorm fart, gode ferdigheiter og ho kan springa opp og ned på sida si i dagevis. Så eg er veldig nøgd med Synne, seier han til Grenda.

Fine ord som unge, lovande Bjørnebøle set pris på.

– Det er sjølvsagt kjekt å høyra. Men han fortener skryt han òg. Han er flink, og det er han som har lege bak mykje av suksessen denne sesongen. Etter at vi tapte dei to fyrste kampane denne sesongen, så tok han grep og la om formasjonen. Så har han pusha oss på treningsfeltet og heldt ut med oss utover i sesongen, så han har verkeleg stått på, seier ho.

Skuffa

Endringa av taktikk gav resultat. For sjølv om det enda i eit bittert tap mot Lyn over to playoffkampar, kan Åsane-jentene sjå tilbake på det som er damelagets beste sesong nokosinne. 2. plassen i 1. divisjon er nemleg den beste tabellplasseringa i damelagets historie.

– Folk var skuffa i går, og folk kjem nok til å vera skuffa ei stund. Så kjem det nok til å synka inn at vi eigentleg har gjort ein god sesong til slutt. Men det er litt tungt å sjå det no, seier Synne.

For sjølv om det unge laget i oransje gjekk inn i playoffkampane utan noko form for press, så kjem håpet om opprykk snikande når ein er så nære som dei faktisk var.

– For oss var dette eigentleg to bonuskampar. Det var ingen som venta at vi skulle slå Lyn. Men når du er så nære og står oppi det, så kjem jo håpet om opprykk. Stemninga var god før kampane, og vi var einige om å gå ut i hundre no på søndag, men Lyn vart dessverre for sterke for oss, seier Bjørnebøle.

Synne, som spelte seg inn i kampen om årets spelar i 1. divisjon denne sesongen, gjekk laus på sin fyrste eksamen dagen etter opprykkskampen. No gler ho seg til ferie.

– Eg kjenner at det har vore ein lang sesong, då særskild mentalt. For når du ligg oppe i toppen der, så har du alt å spela for i kvar einaste kamp. Så eg kjenner at det skal bli godt med ferie, ler ho.