Får midlar til å førebygge overdosar

15. februar vart det søkt om midlar frå tilskotsordninga Nasjonal overdosestrategi – Overdoseforebygging i kommunane. I søknaden kjem det fram at eininga ynskjer å arrangere ein fagdag og skipa i stand ein felles samhandlingsarena til hausten.

Målet er å «auka kompetanse gjennom informasjon og erfaringsdeling», samt «betre samarbeid med relevante aktørar som politi, ambulanse og spesialisthelseteneste».

18. mai kom tildelingsbrevet frå Helsedirektoratet, kor Kvinnherad vert løyva inntil 100.000 kroner for å gjennomføra desse aktivitetane. Retningslinjene for satsinga viser at desse aktivitetane er heilt i tråd med det tilskotet skal gå til, nemleg å:

«Redusere talet på overdosar og overdose-dødsfall i kommunen, samt utvikle og overføre kunnskap om overdoseforebyggande arbeid til nye kommunar.»

For 2022 er det løyvd 4 millionar kroner til den nasjonale satsinga, og Helsedirektoratet opplyser at dei har motteke 51 søknadar.

«De får overført 87.607 kroner i ubrukt tilskot frå tidlegare år, og dette er inkludert i tilskotsbeløpet. Utbetalinga for i år blir på 12.393 kroner», heiter det i tildelingsbrevet.

Ynskjer vidare kompetanseheving

Kvinnherad kommune har allereie etablert ei satsing rundt tematikken, noko som også er omtala i søknaden:

Sommaren 2020 vart det oppretta eit kommunalt overdoseteam som hausten 2020 har hatt fokus på Naloksonutdeling. Kommunen vart kåra til Åretsnykommar i Naloksonprosjektet. Det vart også arbeid med informasjon og utdeling av brukarutstyr.

I dette arbeidet har vi som føremål å redusere tal overdosar og konsekvensen av desse overdosane. I 2021 har vi hatt fokus på ernæring som overdoseførebygging og hatt tilbod om næringsdrikkar/smoothiar til personar i målgruppa. Tilbodet har vore veldig populært.

Det å sikre kompetanseheving og deling hjå tilsette vert viktig for å sikre effekt av tiltaka.