Får kjøpa skulebygg for 1 krone

Sunde grendalag får overta gamleskulen i bygda til den nette sum av 1 krone pluss ulike gebyr, dersom formannskapet godkjenner det. 

Etter at Husnes konfeksjon flytta ut i september i fjor, vart gamleskulen ståande tom. Både Sunde grendalag og ein privatperson meldte si interesse for å overta, og rådmannen har no gitt tilbodet til fyrstnemnde. Ei slik løysing har blitt gjennomført også andre stader i kommunen.

– Dei seinare åra har nedlagte skulehus vorte overteke av bygdelaga for kr 1,-, då dei forutan å vera skule også har fungert som viktige kultur- og møteplassar for bygdefolket. Kommunen har ikkje bruk for eigedomen i dag, og kan heller ikkje sjå at dette vil bli aktuelt i nær framtid, skriv sakshandsamar Grethe Sandvik i eit brev til grendalaget.

Kjøparen må imidlertid dekka oppmåling/kartforretning som kosta 19.942 kroner, dokumentavgift på 2.500 kroner og tinglysingsgebyr på 525 kroner. Kommunen stiller elles som vilkår at dei får kjøpa bygget tilbake for 1 krone, dersom det vert lagt ut for sal att.

 

Mykje arbeid

Gamleskulen vart bygd i 1919, og var i bruk som skule fram til 1963. Seinare har det vore fritidssenter, barnehage, ungdomsklubb og konfeksjonsfabrikk der.

– Sunde grendalag gler seg til å ta fatt på jobben med å få eit flott aktivitetsbygg i grenda, og håpar på positivt svar frå formannskapet, svarar leiar Heidi Lee attende til kommunen. Der aksepterer ho også vilkåra som vert stilte.

Grendalaget påpeikar at vegen til eigedomen er sterkt vasskadd. Dei ser elles for seg at det elektriske anlegget må vølast, bordkledning skiftast, toaletta setjast i stand og kjøken monterast.

Saka kjem truleg opp for formannskapet den 9. februar.