Får ikkje vera med i utval

Både Frp og SF ynska seg plass i det nye eigarskapsutvalet, men vart avviste i denne omgang.

Kvinnherad kommune skal no oppretta eit eigarskapsutval, som skal laga retningsliner for eigarskapsstrategien i aksjeselskap der kommunen sit med majoriteten av aksjane. Kommunedirektøren innstilte på at utvalet skal bestå av ordførar, varaordførar og representant for det største opposisjonspartiet. Næringssjefen skal vera sekretær.

Ove Lemicka (Frp) rådde til å auka til fem medlemer, slik at både Frp og SF fekk plass.

– Det er veldig viktig kva vi gjer med det vi eig, og då bør utvalet vera breiare samansett enn berre dei største partia, sa han.

Men han fekk ikkje støtte frå Gunnar Våge (Sp).

– Dette er eit arbeidsutval som skal leggja til rette for sakshandsaming i formannskapet og kommunestyret. Eg synest ikkje det skal vera så stort dette utvalet, vurderte han.

– Det er enkelt å forklara dette for Gunnar Våge. Viss hans parti hadde stått utanfor, så hadde han også gått inn for å utvida utvalet, kontra Lemicka.

Hege Lægreid Røssland (SF) sa at ho kunne støtta innstillinga dersom ein føretek ei evaluering etter eitt år. Lemicka heldt derimot på sitt.

– Eg opprettheld forslaget om fem representantar, så får de heller stemma det ned. Men då har vi i alle fall vist at vi er vesentleg meir demokratisk innstilte enn de andre, meldte han.

Innstillinga vart dermed vedteke mot éi røyst. Tillegget om evaluering etter eitt år, fekk full tilslutnad.