Får ikkje gjennomført First Lego League utan hjelp

Newtonlærar Matthias Zimmermann fortel at dei i forkant av årets Lego League har slite med å få tak i nok sponsorar til å få gjennomført det spanande og innovative prosjektet. Etter å ha teke kontakt med alle bedrifter i Kvinnherad, anten direkte eller gjennom Kvinnherad Næringsservice, har det vore få interesserte.

Havet og havbruk

– Etter suksessen i fjor hadde me planar om å gjennomføra First Lego League også i år, og trudde at det kom til å gå som ein leik. Slik gjekk det derimot ikkje. Så langt har me fått 3 sponsorar, SKL, Sparebankstiftinga og Hydro Husnes. Sjølv om dei har kome med ein god slump med pengar, så er det framleis ikkje økonomisk rekkevidde, fortel Zimmermann.

– Mange har synt interesse, men så har me ikkje høyrt noko meir og no går snart påmeldingsfristen ut. Den stengjer 13. juni og etter det kan me ikkje vera med, legg han til.

Zimmermann meiner det er kjempeviktig at dei også i år får gjennomført, spesielt med tanke på at årets tema er «Havet og havbruk».

– I prosjektperioden skal elevane jobba med problemstillingar opp mot temaet, og dei må både laga problemstillingane sjølve og forska sjølvstendig, då gjerne i tilknyting til lokalmiljøet. Det er her eg ser for meg at havbruksfolket nesten måtte stått i kø, men det gjer dei nok ikkje, ler Zimmermann oppgitt.

– Under innovasjonsdelen i år synest eg at me burde stå langt fram her i Kvinnherad i og med at me har så mange aktørar innan yrket. Det som ofte skjer er at elevane jo har kontakt med næringslivet og tek dei med på prosessen. I historisk Lego League-samanheng har det hendt fleire gonger at elevane har funne på innovasjonar som har blitt klekt ut i verkelegheita og blir brukt i dag, påpeikar han.

Problemløysing og innovasjon

Vidare poengterer han at First Lego League fyrst og fremst ikkje handlar om lego, før han forklarer kvifor dette er eit så viktig, lærerikt og framtidsretta prosjekt for born og unge å vera med på.

- Ikkje berre gjev dette born og unge høve til utvikling i realfag gjennom praktisk læring og dagsaktuelle problemstillingar. Det vil også bli eit tettare samarbeid mellom skule og næringsliv, der elevane sjølve er initiativtakarar til løysingar. I tillegg ser me eit tydeleg behov for at barn og unge tileignar seg ferdigheiter som set dei i stand til å løysa framtidas utfordringar i eit samfunn som er i stor utvikling, seier Zimmermann.

- Me veit ikkje kva desse utfordringane vil bli, men me veit at ferdigheiter som problemløysing, samarbeid, det å vera innovativ og auka teknologisk kompetanse vil vera viktige. Me vil at barn og ungdom ikkje berre skal kunne bruke teknologi, men også påverke og skapa den. Berekraftige løysingar i framtida krev at barn og unge får erfaringar og kunnskap av denne typen problemstillingar i skulealder, legg han til.

Då First Lego League vart arrangert i Kvinnherad i fjor deltok om lag 300 elevar frå 6. og 9. trinn. Eitt lag gjekk vidare til Skandinavisk finale og to gjekk vidare til Scandinavian Innovation Award, som to av totalt ti nominerte etter finalen.

- Det hadde vore utruleg kjekt for elevane i Kvinnherad viss me hadde fått til dette igjen, avsluttar Zimmermann.

Dette er First Lego League:

«Prosjektet består av «innovasjonsprosjekt», «teknologi» og «kjerneverdi». Prosjektdelen er forskingsdelen i programmet. Her skal deltakarene forska på årets tema, finna ei relevant problemstilling for så og føreslå ei løysing på denne. Det kan vera eit produkt, ei teneste, ei forbetring av noko som allereie eksisterer eller andre innovative løysingar. Dei skal også dele løysinga si.

Teknologi består av robotkonkurransen. Der skal elevane læra å programmera og byggje ein robot. Dei skal bruka han til å løysa oppgåver på ein robotbane. Deretter skal dei forklare oppdragsstrategien og kvifor dei har valt å byggje roboten slik dei har gjort.

Kjerneverdiane omkransar alle kategoriane og skal vera tydelege gjennom heile prosjektperioden. Fokuset er på at deltakarane skal jobba saman som eit lag, respektera kvarandre og ha det gøy».