Får geologar på plass på tysdag

Fredag kveld kom det ned fleire store steinar i eit 150 meter breitt område på vestsida av Bondhusvatnet. Steinane er vurdert å ha kome frå fjellsida så høgt som 400 meter over vatnet. Tysdag kjem det endeleg geologar til rasstaden, og vil synfara området og vurdera risikoen for nye skred i området.

Sender inn drone

Det er Anbjørn Høivik som er den i Kvinnherad kommune som har fått raset på sin pult.

– Me har rådført oss med Norges vassdrags og energidirektorat (NVE), som sendte ballen tilbake til oss. Dermed har me hyra inn geologar frå Norconsult, som kjem til staden først på tysdag, grunna ferieavvikling og sjukdom hos dei, forklarer Høivik til Grenda.

Kvinnherad Brann og redningsteneste skal før den tid fly inn med drone og filma området, slik at geologane har noko informasjon i forkant å gå etter.

– Me kryssar fingrane for at dette kan bli sjekka greitt ut. Me samarbeider godt med grunneigarlaget i området, som er flinke til å løysa utfordringane som oppstår. Vidare har me snakka med politiet, som sette opp sperrebanda som no står på stien innover langs vestsida av vatnet, og råda dei til å halda sperreband på plass litt til, og har fått gehør for det hos dei, opplyser Høivik.

Han er opptatt av at situasjonen må handterast på ein god måte, med tanke på turistvolumet i området. Det er framleis råd for tilreisande og lokale å gå opp til vatnet, men vegen vidare mot Bondhusbreen og Fønderdalen er inntil vidare stengt.

Sauebeite

Området ved Fønderdalen er også brukt som sauebeite for Linda Sundal Utne og Øyvind Utne, og Elin Bondhus Holmedal og Morten Holmedal. Øyvind Utne har førebels ikkje kome seg forbi rasstaden for å sjå til sauene.

– Som sauebonde må eg inn og sjå til sauene ein gong i veka, og no må eg eventuelt låna meg båt for å koma fram. Inntil vidare avventar eg kva som kjem fram frå geologane, seier Utne til Grenda.

Han er med andre ord mykje i området som raset har gått.

– Som lokalkjent i området oppfattar eg dette som eit vanleg steinras. Det ligg frå tid til annan steinar i stien. Eg har aldri følt meg utrygg der, men det likevel ikkje eit området eg vil opphalda meg over lang tid. I fjor sommar såg eg folk liggja i hengjekøye i dette rasområdet. Det vil eg rå i frå, seier Utne.

– For ettertida meiner eg dei bør opna opp stien og heller skilta at det er farleg å telta der. Litt ekstra skilting hadde kome vel med, vurderer sauebonden.