Får fritak og permisjon frå politiske verv
I kommunestyret sitt møte 22. juni vart det vedteke at dei tre som nyleg har søkt om fritak og permisjon frå politiske verv får innvilga dette.
Publisert
Erling Niclasen er vald inn i kommunestyret i Kvinnherad for Høgre, og har vore 2. vara til formannskapet. På grunnlag av helsemessige utfordringar har han søkt om fritak frå politiske verv ut kommunestyreperioden 2019 – 2023.
Are Traavik (Sp) søkte om fritak frå politiske verv 12. mai, grunna endra arbeids- og livssituasjon. Traavik er vald inn i kommunestyret i Kvinnherad for Senterpartiet, samt fast medlem av kontrollutvalet. Som Niclasen har også Traavik søkt fritak for kommunestyreperioden 2019-2023.
Annonse
Nikolai Rørdal har søkt om permisjon frå sine politiske verv frå 11.07.2022 – 10.07.2023. Grunnen er at han skal flytte til Bergen, kor han skal byrja i arbeid.
I tillegg til å vera vald inn i kommunestyret for Arbeiderpartiet, har Rørdal også følgjande verv: Medlem i levekårsutvalet og 10. vara til formannskapet.
Ny medlem i levekårsutvalet i permisjonstida til Rørdal er Magne Huglen, medan Audun Magne Øvretveit går inn som fast medlem i kommunestyret i same periode.
