Får byggja fiskepassasje

Formannskapet sa samrøystes ja til å løyva midlar til den planlagde fiskepassasjen frå Melselva til Myrdalsvatnet.

Rosendal elv- og utmarkslag, i samarbeid med Hardanger villfisklag, planlegg å byggja ein fiskepassasje som vil utvida gyteområdet for fisken i Melselva i Rosendal. På torsdag løyvde formannskapet 42.000 kroner til prosjektet. Pengane skal hentast frå fiskefondet «Blåfalli».

Aurebestanden i Melselva er sterkt redusert grunna fleire oppgangshinder. I ein rapport har Rådgivende biologer AS difor føreslege å fjerna eksisterande demning i Myrdalsvatnet og eventuelt byggja fiskepassasje. Å fjerna demninga er ikkje aktuelt, men ein fiskepassasje er no i kjømda. Rosendal elv- og utmarkslag har fått utarbeidd eit kostnadsoverslag på 163.000 kroner.

«Etablering av fiskepassasjen skal samkøyrast med bygging av ny og sikra overgang i tilknyting til eksisterande demning i Myrdalsvatnet», skriv elv- og utmarkslaget i søknaden til kommunen. NVE har allereie godkjent tiltaket, medan ein ventar på svaret til Fylkesmannen.

Myrdalsvatnet ligg om lag 370 meter over havet.