Får besøk av Kapteinen til prosjekt om psykisk helse

Helselaget har motteke 30.000 kroner frå Sparebank1-stiftinga Kvinnherad, og skal bruka midlane til å setja lys på psykisk helse i ein samanheng der ein «kan auka refleksjonar rundt sjølvbilete, krav og eigne prestasjonar». Uskedal helselag skal gjera dette i samarbeid med Rosendal helselag og Uskedal Aktivitetshus.

Psykisk helse i prestasjonssamfunn

– Det er stadig meir press på den enkelte, og det kan påverka psykisk helse. Ein opplever stadig auka trong for psykisk helsehjelp, og ein ser i kvardagen at me mister menneske gjennom sjølvmord, det gjeld òg i vår kommune. Me ønskjer å sjå på desse vanskane frå ulike perspektiv, og vil gjera noko som kan vere samlande og fjerne tabu i fellesskap, skriv leiar i Uskedal helselag Elin Legland.

Uskedal helselag arbeider med prosjektet «Psykisk helse i eit prestasjonssamfunn». I første omgang satsar dei på eit oppbyggjande føredrag med John Hammersmark. Han kjem til Kvinnherad 13. november. Først skal han ha føredrag for elevane ved Rosendal ungdomsskule, før han entrar Aktivitetshuset i Uskedalen seinare same dag. John Hammersmark er kjend som «Kapteinen» i Kompani Lauritzen.

– Me ser Hammersmark som eit fint førebilete for mange, som kan bidra til å løfte vanskeleg tema, meiner Legland.

Ho meiner føredraget han skal halda kan bidra til dette. Føredraget er skildra slik: «Konkrete verktøy for å drive egen utviklingsprosess og få bevissthet og refleksjon rundt egen person. Gode og konkrete metoder for hvordan man bør tenke og samhandle. En rekke betraktninger, refleksjoner og råd rundt hva som skal til for at både individer og samarbeidet mellom dem skal fungere – også når man mislykkes. Lærdommene er relevante overalt.»