– Får aktivitet i bygda, samstundes som me har eit klart formål med hjelp til Ukraina

Då inviterer dei nemleg til sosialt lag, underhaldning og innsamlingsarbeid til Salam LADC Norway sitt nødhjelpsarbeid i Ukraina.

– Gruppa var så vidt oppretta på Facebook før denne ideen kom på bana. Men me ville gjera noko , og sjølv om flyktningearbeid ikkje blir Sundedamene si faste nisje, var dette ein meiningsfull plass å starta, fortel Cecilie Thorsen.

Ho blir omtala som primus motor, både for Sundedamene og for hendinga som skal skje på laurdag. Dessutan har ho sjølv arbeidd med flyktningar i Hellas, og slikt hjelpearbeid ligg såleis tett til hjarta hennar.

Takksame for støtta

Og trass i kort varsel og at Sundedamene er eit heilt friskt pust i lagslivet i Kvinnherad, har dei berre blitt møtt av velvilje og støtte til hendinga som skal skje. Det blir auksjon av bilete, både maleri og fotografi. I tillegg blir det basar med utlodding av flotte gevinstar.

Alt frå sjølvstrikk, ved, dekkskift, workshop i isbading, bøker frå lokale forfattarar og sundepølser er på den fyldige gåvelista.

– Givargleda er så stor, alle seier jo ja! Så me må retta ein stor takk til dei som bidreg, seier Randi Karin Tveit, som er ei av dei andre Sundedamene.

Meiningsfullt og kjekt

Då Grenda møter damene på Sunde er også Erna Mikkelsen med. Etter to år med pandemi er dei klare for å dra i gong meir aktivitet, og gjerne faste hendingar som quiz, familiedagar, konsertar, poesikveldar eller liknande, men understrekar at dei framleis er på ide-stadiet.

– Folk har behov for å treffast no, prata med andre og kosa seg. Så med dette arrangementet i båthuset vil me gjera eit meiningsfullt innsamlingsarbeid samstundes som tiltaket kjem til gode for bygda, seier Mikkelsen.

Variert program

Alle tre er samde om at Sunde er ei bygd full av ressurssterke kvinner, samt mange kreative og dyktige personar. Fleire av desse er hanka inn for å underhalde publikum på laurdag kveld. Kveldens konferansier blir Bjørn Erik Eliassen.

– Det blir livemusikk; felespel med Egil Våge, Sundegutane kjem, og ein dj skal spela musikk utover kvelden. Så skal me syngja litt og det blir dans, fortel Tveit.

I tillegg kjem det to videohelsingar. Ein frå Martin Kvernbekk, styreleiar i Salam LADC Norway, som skal fortelje litt om arbeidet som Sundedamene samlar inn pengar til denne kvelden. Den andre videohelsinga kjem frå Kvinnherad sin eigen stuntpoet, Arne Torget, som har skrive eit dikt om krigen i Ukraina.

– Han kunne ikkje koma sjølv, men lova oss ei videohelsing, fortel Tveit.

Når dei først samlar folk frå bygda, vil dei også nytta høvet til å kome med ein større presentasjon av Sundedamene.

– Om det er andre som har idear om kva dei ønskjer å få til her, er dei hjarteleg velkomne. Me er opptekne av å finna måtar å samarbeide med dei andre laga som finst her. Sundedamene blir eit supplement, og så håpar me jo at me kan stilla opp for kvarandre når det skjer noko, smiler Thorsen.

Dei tek i mot 100 gjester i båthuset på laurdag, og oppmodar folk om å bestille billettar på førehand. Om nokon vil bidra med gevinstar eller anna, kan dei ta kontakt med Cecilie Thorsen.