Får 462.000 kroner til utviklingsprosjekt

31. mai 2022 søkte kommunen om midlar frå Statsforvaltaren i Vestland si tilskotsordning Stimuleringsmidlar til eigeninitiert utviklingsprosjekt.

Kvinnherad er vertskommune for det eigeninitierte prosjektet, som er eit samarbeid med Tysnes og Austevoll kommune. No har dei søkt om pengar til å vidareføre prosjektet, som starta opp i 2019.

Formålet med prosjektet er å «utvikla verksame hjelpetiltak på tvers av kommunegrenser, samt å utvikla førebyggjande tiltaksapparat i samarbeid med tilstøytande tenester i kommunane.»

Vil nå måla i oppvekstreforma

I søknaden kjem det fram at kommunen søkjer om frikjøp til personell, dekking av utgifter til kurs, honorar, lokaler og reiser, samt møter og samlingar på tvers av kommunane, på grunnlag av at dette vil vera ein styrke inn i arbeidet med å nå måla i oppvekstreforma.

«Statsforvaltaren vurderer at de har grunngjeve behovet for vidareføring av dette utviklingsarbeidet godt, og at de stetter dei vilkåra som Barne-, ungdoms og familiedirektoratet har sett for tilskotsmidlane», heiter det i tildelingsbrevet som kom 23. juni.

Tilskotsordninga er ein del av kompetansestrategien for det kommunale barnevernet, og skal medverke til å stimulere til teneste- og tiltaksutvikling i kommunane for å styrke oppfølginga av utsette barn og familiane deira.