Får 2 millionar for å gjenta Rein Hardangerfjord
I september i fjor var store og små engasjerte for å rydda plast langs Hardangerfjorden. No har prosjektet fått to millionar kroner til å gjenta suksessen i år også.
Publisert
Sist oppdatert
Pengane kjem frå Agenda Vestland, ei stifting oppretta av Sparebanken Vest.
– Rein Hardangerfjord vart en kjempesuksess! Framtidshavet har gjennom «Rein Hardangerfjord» utvikla ein modell der heile samfunnet langs fjorden vert mobilisert for å rydde strendene effektivt for plast. Difor gir Agenda Vestlandet no 2 millionar nye kroner, slik at ein både kan rydde Hardangerfjorden, og begynne å planlegge å rydde verdas lengste fjord – Sognefjorden, seier Frode Nergaard Fjeldstad, dagleg leiar i Agenda Vestlandet, om løyvinga.
Annonse
Mobiliserer frivillige
Stiftinga Framtidshavet sette seg i 2022 som mål å rydde heile Hardangerfjorden for plastsøppel på berre ein dag. Gjennom pilotprosjektet Rein Hardangerfjord 2022 engasjerte dei frivillige, næringsliv, kommunar og organisasjonar både lokalt og regionalt til å verne om fjordane og naturen rundt. Over 2300 frivillige var med og reinska over 1000 km kystline, og meir enn 20 tonn plast vart plukka.
Punktum for aksjonen vart markert med ein konsert i Skålafjøro med Emma Steinbakken, Stina Talling og Morten Abel, som ei påskjøning til alle dei frivillige som hadde bidrege i strandryddinga.
Med ei tildeling på 2 millionar kroner frå Sparebanken Vest si stifting Agenda Vestlandet kan Framtidshavet gjennomføra ein ny ryddeaksjon i Hardanger i september, og ein vil også planleggja ein tilsvarande aksjon for Sognefjorden til neste år.
Annonse
– Tildelinga vil sikra at Framtidshavet kan gjennomføre prosjektet Rein Hardangerfjord 2023. Dette har svært mykje å seia for fjordhelsa dei stadene me ryddar, og me har allereie mange store og små aktørar som banker på døra og vil vere med å bidra til årets aksjon og framtidige prosjekt, seier Kenneth Bruvik i Framtidshavet.
