Fantastisk god sommar

– Det har vore ein fantastisk god sommar, med mykje folk og mykje arbeid. Det har merkast godt at folk er på norgesferie for andre året på rad, men den siste veka har det også kome danskar og tyskarar. Det har vore mykje meir folk innom i år enn i fjor, fortel Brødskreppa, også kjend som Lene Vangberg Monsen, etter ein varm og travel arbeidsdag.

Korgene på veggen er tomme for lengst då Grenda er innom for å høyre korleis sommarsesongen har vore for det vesle steinovnsbakeriet i Omvikdalen. Likevel er det fleire håpefulle kundar som kikkar inn døra for å høyre om det er bakst å få. Det er lukkedagen for dei alle, for det er faktisk nokre bollar, rundstykke og tomatbrød igjen. Stort sett har ho vore utseld når dagen er omme.

«Når me det?»

Anna Gabrielle Hollund (11) og Marit Djønne frå Bømlo er blant dei mange kundane som har reist til Omvikdalen for å handle gjærbakst. Eitt minutt over stengetid vert bakevarene deira betalt.

– No raste me inn for å nå deg, smiler Marit.

– Me har handla her før, og det var så godt! Difor måtte me innom i dag òg, supplerer Anna Gabrielle.

Begge er svært nøgde for at dei rakk innom og med det fekk sikra seg ferskt innhald i brune posane på benken.

Trafikken forbi bakeriet har vore svært så merkbar, og sjølv om mange tydeleg har hatt fotografiske målsetjingar for å køyre opp dalen i sommar, er det fleire av desse som ikkje berre har fått likes på fotografi av det turkise Fjellhaugvatnet, men også fersk bakst.

– Det er mange som har tenkt seg opp i Fjellhaugen for å fotografera fossen som blir gledeleg overraska over at det ligg eit bakeri midt i autostradaen, smiler Vangberg Monsen.

Går i eitt

Det har vore to personar på jobb i bakeri og butikk i sommar, og det har også vore svært god hjelp i Kjetil Mehl, mannen til bakaren. Bakeriet har holdt ope tre dagar i veka gjennom heile fellesferien, sjølv om det ville vore marknad for å ha ope kvar dag.

– Dagane eg har ope går det i eitt. Eg startar klokka to på natta, og er ferdig med å vaske og gjere klart til neste dag utpå ettermiddagen. Måten eg driv på, der eg produserer alt frå botnen av, ville ikkje vore forenleg med familie, skulle eg hatt ope kvar dag, fortel ho.

Komande helg er siste innspurt før Lene tar ein liten, men velfortent ferie. Då vert dei populære solskinsbollane produsert for siste gong i sommarsesongen.

– Det har gått veldig masse solskinsbollar i sommar. Frukt- og nøttebrødet har også vore populært, likeins grovbrød. Det virkar som at folk er veldig medvitne på kva dei kjøper, og at dei dessutan set pris på at det vert nytta økologisk mjøl, avsluttar ho.