Fann stranda si full i krabbeskal
– De kan skriva at eg vil gje dagens ris til dei som dumpa krabbeskalet sitt i stranda mi.
Publisert
Sist oppdatert
Fredag kveld gjekk Merethe Albrethson frå naustet sitt mellom Rosendal Fjordhotel og Rosendal ungdomskule. Laurdag føremiddag returnerte ho med barn og barnebarn, berre for å oppdaga at nokon i løpet av natta hadde dumpa bøttevis med krabbeskal i stranda føre naustet.
– Tenk dykk litt om kor de hiv ting! Ein skriv mykje om allemannsretten, og me har blitt vane med at folk trør over oss når me er ved naustet, men at ein kastar driten sin her, er ikkje greitt. Tenk dykk litt om! seier ei Merethe Albrethson med undertrykt frustrasjon.
Annonse
– Det er ikkje greitt å dumpa det på innsida av kaien. Eg fylte to bøtter med skal, og endå var det mykje att som eg ikkje har fått opp enno, så det har vore eit retteleg krabbalag som nokon har dumpa der. Det følgjer plikter med rettar. Bruk vanleg folkeskikk og ta omsyn til kvarandre, sluttar ein harmdirrande nausteigar.
