Fann skadd person ved rundkøyring på Husnes

Politiet fekk inn ei bekymringsmelding om ein bil som hadde stoppa ved Samspel-rundkøyringa på Husnes klokka halv elleve laurdag kveld. Då dei kom til staden, observerte dei ein bil som køyrde frå staden.

– Det var då ein skadd person som hadde tilknyting til denne bilen der. Vedkomande vart fyrst køyrd til legevakt og så vidare til sjukehus, seier lensmann Sigurd Børve.

Uoversiktleg

Dei fekk også ei forklaring på kven som hadde køyrd frå staden.

– Vedkomande som køyrde bilen har fått førarkortet beslaglagd på grunn av brot på dei plikter ein har som sjåfør ved ulukker og liknande, seier Børve.

Nøyaktig kva som har skjedd er framleis uoversiktleg for politiet.

– Vi ser på det som ei mogleg valdshending, men det er uoversiktleg. Denne personen har kome ut av bilen med eller utan fart og fått skadar av det. Om det er vald eller av eigen vilje, står att å finna ut av, seier Børve.