Fann midlar til idrettshallen: – Må få piggskoa på seg

Då kommunedirektøren i slutten av oktober presenterte budsjettforslaget sitt, meinte han det var nødvendig å utsetja ein del investeringar. Dette råka mellom anna idrettshallen i Rosendal, som vart utsett heilt til 2035. Dette reagerte fleirtalspartia Høgre, Ap, KrF og Venstre på då Kommunestyret gjorde endeleg budsjettvedtak nokre dagar før jul.

– Vi synest det var umusikalsk av administrasjonen å skyva hallen ut i ti år når eit samla kommunestyre hadde det med i budsjettet i fjor. Difor har vi lagt inn 2 millionar til prosjektering, så no lyt rett og slett administrasjonen få piggskoa på seg og koma i gang, og det skal skje i 2025. Og så skal investeringane koma i 2026 og 2027, sa Knut Johannes Helvik (H).

I tillegg til dei 2 millionane til planlegging i 2025, er det i økonomiplanen lagt inn 30 mill. i 2026 og 20 mill. i 2027 til hallen.

– Dette er eit tiltak som er veldig viktig for barn og unge i heile området. No vil vi visa at det skal prioriterast, og det må skje innan kort tid. Samtidig løyver vi pengar til forprosjekt for symjehallen på Husnes, supplerte Per Harald Havnen Löfgren Johansen (Ap).

Ikkje Kvinnherad arena

INP og MDG var derimot ikkje positive til denne pengebruken.

– Vi får håpa dei ikkje har tenkt å byggja ein Kvinnherad arena 2, men at den blir tilpassa folkegrunnlaget og at ein tek høgde for driftskostnadane, sa Gunnar Helleland (INP).

Jostein Saghaug (MDG) var endå meir kritisk.

– Eg er veldig kritisk til at fleirtalet rett og slett kuppa investeringsbudsjettet, der ein har lagt inn idrettshall i Rosendal – som for så vidt er veldig flott å ha – men ein har valt å setja det føre skulen på Valen, ein har valt å setja det føre eit bufellesskap på Husnes, og ein har valt å setja det føre fullfinansiering av eit helsehus. Eg håpar innbyggjarane merkar seg dette, sa Saghaug medan ordførar Vegard Bjørnevik sat og rista på hovudet.

Per Harald Havnen Löfgren Johansen arresterte Saghaug for det han tykte var ein veldig lettvint bruk av omgrepet «kupp».

– Vi har ikkje teke ut noko av det som ligg i forslaget frå kommunedirektøren når det gjeld Valen, det ligg fast. Tilsvarande ligg pengane til bufellesskap på Husnes inne i investeringsbudsjettet, slik det gjorde frå kommunedirektøren. Her er det ikkje snakk om at vi har tatt ut andre tiltak og gjort noko kupp, her har vi valt å prioritera at barn og ungdom i Rosendal, på skulane, i idrettslaga og i nærområdet skal ha ein idrettshall, sa Johansen.

Til Gunnar Helleland understreka han at det ikkje er ein ny Kvinnherad arena som skal byggjast.

– Men ein idrettshall der ein faktisk kan driva på ein god måte og ha gode fasilitetar også i denne delen av kommunen, slo Johansen fast.

Utegruppe

Heidi Bolette Jakobsen (INP) var likevel ikkje nøgd, og minna om at saka handla om prioriteringar.

– Ein klarar å prioritera idrettshallen, medan det på Husnes står ein del barn utan barnehageplass fordi det ikkje er nok plassar. Dei lurer på «skal vi laga ei utegruppe, kva skal vi gjera?». I Bringedalsbygda er det ei utegruppe, for dei har ikkje nok areal. Desse tinga gjer det vanskeleg å framskunda idrettshallen i Rosendal, men eg forstår ynsket, sa ho.

Johansen teikna seg då for ein rask replikk om prioriteringar.

– Eg finn det merkeleg at INP kritiserer oss for at vi gjer prioriteringar, når INP ikkje er viljuge til å stemma på noko budsjett, og dermed ikkje gjera prioriteringar i det heile. Det er overraskande, og eg vil seia eit veldig uheldig signal, meldte han.

Fleirtalskoalisjonen sitt budsjett vart vedteke. Dermed er idrettshallen igjen oppført med løyvingar dei neste tre åra.