Fann død hjort i sjøen

Dei tilsette på Lerøy sitt anlegg ved Tveitnesvik fekk ei uvanleg oppleving onsdag føremiddag. Dei oppdaga nemleg ein hjort på rek i sjøen, heilt inn til eine ringen.

– Han hang i fortøyinga til merden. Vi ringte fyrst til viltnemnda, og så til politiet. Det vart då bestemt å søkka dyret, fortel driftsoperatør Knut Inge Øvrehus.

Sidan vomma var oppblåst, måtte hjorten «få litt hjelp» til å søkka. Ifølgje Øvrehus dreiar det seg om ein spissbukk, noko som vil seia ein bukk som er halvtanna år gamal, og som er i fyrste året med gevir.

– Kva trur du har skjedd?

– Det er vanskeleg å seia. Truleg har han dotte på sjøen, kanskje inne ved Furebergtunnelen, for der held hjorten til. Det var òg eit hól i han, men det kan koma frå fugl eller andre dyr. Det var berre sida som var opp mot sola som var påverka, undersida såg heilt fin ut. Han har neppe lege lenge i sjøen, kanskje eit par dagar, vurderer Øvrehus.