Familiedag om stjerner og planetar: - Får eit større perspektiv på vår eigen klode

– Eg var ikkje førebudd på at det skulle koma så mange. Det er nok eit tema som mange syns er spennande, seier Øystein Skaala, primus motor for Steinparken og familiedagen.

Det var fullt av folk i absolutt alle aldrar inne i Dinosaurhuset då Skaala ynskte velkomen. Føredraget starta med at Skaala viste ein film om livet på vår eigen klode, før me retta blikket ut i universet. Filmen handla mellom anna om dinosaurtida, og me kunne høyra engasjerte gutestemmer som diskuterte:

– Er det der ein T-Rex?

– Nei, den har tre klør på framføtene, ikkje to.

– Då må det vera ein allosaurus.

– Eller ein giganotosaurus.

Eit blikk utover kommunegrensene

Kenneth Bruflath tok over, og heldt eit føredrag om alt me kan sjå gjennom eit teleskop. Me fekk sjå bilete av både planetar, galaksar og stjernehopar. Då me fekk sjå ein illustrasjon av vårt solsystem, var det fleire av dei yngre i publikum som fekk bidra i føredraget:

– Det er Merkur!, kom det kontant frå Aron Attramadal då Bruflath peika på den inste planeten i solsystemet.

Bruflath fortalte om dei ubegripelege avstandane og storleikane i universet. Han forklarte at det er matematisk sannsynleg at det finst liv der ute, men han var slett ikkje sikker på om det er intelligent liv.

– Det er av og til kjekt å sjå litt utover kommunegrensene, oppsummerte Øystein Skaala.

Kenneth Brufladt har vore med og kjøpt eit teleskop for Steinparken, og Skaala håpar at dei kan arrangera ein kveld med teleskopet for vaksne seinare i år.

– Det får me til dersom me har ein kveld med klarvêr, og ikkje for mykje månelys som overstråler stjernene, svarar Brufladt til det.

Må ta vare på jorda

Etter føredraget samla folk seg rundt bålpanna utanfor. Nokon grilla marshmallows eller pølser, andre svara på quizen om bergarter som var laga til for dagen. Margun Dahle er aktiv i venelaget, og fortalte at det var blitt baka mykje kaker og bollar for dagen, og kakesalet gjekk unna. Familiar rusla rundt i parken eller sat og drøste med ein kaffikopp.

– Det er fint å kunna ta eit steg tilbake og få eit større perspektiv på vår eigen klode, og alt det fantastiske livet som finst her, sa Øystein Skaala om temaet for dagen.

– Det må me ta vare på!, konkluderte han.