Falt på glatta – seks lårhalsbrot på éin dag

Å bryta lårhalsen er noko som særleg råkar eldre folk, og spesielt kvinner med beinskjørheit, ifølgje Store norske leksikon. Eit slikt brot kan vera alvorleg nok for den som blir råka. Diverre var det fleire innbyggjarar i Kvinnherad som vart utsette for dette på glatta torsdag.

– Vi har i alle fall seks mistenkte lårhalsbrot, opplyser kommuneoverlege Glenn A. Opland til Grenda.

Alle tilfella var i ytre delen av kommunen. Dei seks skadde personane vart sendt til sjukehus på Stord for røntgen og vurdering.

– Er ikkje seks lårhalsbrot på same dag veldig mykje?

– Ja, det er ganske mykje, men vi har vore borti liknande tidlegare når glatta har kome brått på. Folk var nok ikkje førebudde på at det skulle vera så glatt, og hadde ikkje broddane på, analyserer Glenn A. Opland.