Faktisk ikkje så verst i juli

Vêrstatistikken viser at Husnes var den våtaste plassen i Kvinnherad i juli. Der ramla det ned 150,4 millimeter med regn. Matre vart nummer to med 142,3 millimeter, føre Valen som tok imot 140,7.

Nesten som alltid var Sæbøvik tørrast. Denne gongen vart talet 89,5 millimeter. Vang i Rosendal nøya seg med 98 mm, medan Omvikdalen overraskande nok sikra bronsen med 109 millimeter.

Underlagsmaterialet viser at juli var temmeleg todelt. Dei fyrste 10-11 dagane var relativt fuktige, deretter opplevde vi ein god periode, med nokre få unnatak. Men dei unnataka er ikkje lett å bli klok på, for det var store lokale skilnader. Til dømes noterte Mauranger 17,6 millimeter den 22. juli, medan det var tilnærma opplett andre stader. Det same ser vi den 27. Altså at det regna ganske godt einskilde stader, medan andre bygder hadde fint vêr.

Talet opplette døger varierte også; frå heile 17 i Omvikdalen til meir smålåtne 11 på Eik i Rosendal.

Nesten identiske

Samanlikna med fjoråret vart årets juli-utgåve veldig mykje betre. Differansen er størst i Matre med nesten 200 millimeter. Totalt for året etter dei sju fyrste månadane er det derimot liten skilnad på 2023 og 2024. I nokre bygder er tala nesten identiske, i nokre har det regna meir i år, medan tre stader opererer med lågast tal i år.

Dei historiske tala frå Hydro Husnes avslører at juli 1968 er den tørraste med 17,5 millimeter. Den våtaste treng vi ikkje leita lenge etter, for den kom i fjor med 346,2 mm.

Kaldt på Folgefonna

Temperaturen nådde ikkje opp i 30 grader på noko tidspunkt, men Mauranger kom nærast med 29,3 den 20. Den kaldaste målinga sytte Matre for. Der i garden vart det registrert 6,5 grader den 5. juli.

Ifølgje Meteorologisk institutt låg landstemperaturen 0,7 grader over normalen. Normalt er det derimot ikkje at Nord-Norge var varmast. Høgast snitt hadde nemleg Nyrud i Sør-Varanger med 17,5 grader. Høgast dagmåling finn vi på Hitra i Trøndelag, som koste seg med 32,0 grader 21. juli. Den kaldaste staden skal vi ikkje langt til. Folgefonna skisenter enda på 4,5 grader som juli-snitt, noko som var 2,3 under normalt.

Snitt-temperaturen hittil i år er på 8,9 grader, målt i Uskedalen.

Målestasjonar

Oversikten viser noteringane til følgjande målestasjonar: Ølve (Henrik Barthel), Hatlestrand (Gunn-Bente Stølen), Mauranger (Tore Bondhus), Rosendal - Eik (Jan Eik), Rosendal - Vang (Kvinnherad Elektro), Omvikdalen (Birgit Mørkve Hjelmeland), Matre (SKL), Uskedalen (Kurt Haugland), Husnes (Hydro), Valen (Jarle Håvik) og Sæbøvik (Harald Særsten).

Snitt-temperatur totalt pr. juli:

2024: 8,9

2023: 8,52

2022: 8,73

2021: 7,94

2020: 8,92

2019: 8,53

2018: 8,91

2017: 8,18

2016: 8,18

2015: 7,8

2014: 10,3

2013: 7,1

Kjelde: Kurt Haugland, Uskedalen