– Faktisk ei skikkeleg kraftutstilling

– Denne utstillinga er heilt fantastisk! Bileta kjem nesten ut av bileta, og det er masse fargar. Det er det ein kallar for ekspressivt, som kanskje høyrest litt jålete ut, men det er faktisk ei skikkeleg kraftutstilling med masse nostalgi, seier Gøril Guddal med stor entusiasme like før det heile starta.

– Det er barndomen for både den eine og den andre med teltdukar som er både gule, oransje og blå. Det var nokon som sa i stad, «Nei, men sjå på bilskilta, det er jo dei gamle bilskilta». Så utgangspunktet er gamle fotoalbum som han har som inspirasjon, derifrå kjem desse gamle motiva som er gangbare i dag også, fortset ho.

Inspirasjonen

Tor-Arne Moen tok turen frå Notodden, der han både er fødd og oppvaksen, for å vera med på si eiga galleriopning i Guddal denne laurdagen. Den erfarne kunstnaren har gjennom fleire år hatt tresnitt stilt ut i galleriet i mindre skala, men denne gongen fylde han heile galleriet hovudsakleg med måleri som var breiddfulle av nostalgi.

– Tor-Arne Moen har klart kunststykke å leva av kunsten heilt frå start av. Det er ikkje mange som kan seie det same. Han fekk ein pangstart då han fekk laga illustrasjonar til Hamsun sine samla verk. Sidan då har han vore innom både figurative motiv og surrealistiske bilete, men også nostalgiske motiv som han byrja med ganske tidleg. Etter ein god pause er han no tilbake dit, og har laga desse måleria de kan sjå her i dag, fortel Gøril Guddal før kunstnaren sjølv får ordet.

Inspirasjonen til denne måleriserien kom då Moen ein dag fekk besøk av ei gamal dame.

– Eg kjøpte eit hus som var bygd i 1907, så plutseleg ein dag fekk eg besøk av ei gamal dame som banka på døra og sa «Hei, eg vart fødd på kjøkenet ditt, her er fotoalbumet». Ja, ikkje med bilete av sjølve fødselen då, ler Moen.

– Heile albumet var fullt av gamle svart-kvitt-bilete, og eg tende på ideen med ei gong, fortel han vidare.

Underhalding

Mange av dei besøkande var tydeleg imponerte over det dei fekk sjå, og sa seg heilt samd med Gøril.

– Det er jo vår barndom dette, kom det frå ei dame som gjekk rundt i lokalet og beundra kunstverka.

Magnhild Gjengedal og Tore Dyrnes stod lenge og studerte både måleri og tresnitt, og tykte det meste var veldig flott.

– Det er litt som å sjå inn i sitt eige album, og tresnitta er spesielt imponerande, fortel Dyrnes.

Før folk fekk gå rundt på eige hand og nyta kunsten, fekk dei vakker underhalding av den lokale artisten Nanna Sofie Fredheim som hadde med seg Oddgeir Røssland på gitar.

– Det var veldig fint, og det er alltid kjekt å synga på heimebane. I dag er eg heima i fire timar, så er det tilbake til Bergen, fortel artisten etter minikonserten.

Utstillinga vert ståande til 16. juli.