Færre mista livet på norske vegar i 2021

Men for Vestland sin del var det fire fleire som omkom i trafikken i 2021, enn året før.

I fjor mista 87 personar livet på dei norske vegane, i følgje førebelse tal frå Statens vegvesen. Dette er det lågaste talet sidan 1947, og 6 færre enn i 2020. Likevel er korkje Statens vegvesen eller Samferdselsdepartementet nøgde, og vil difor intensivere arbeidet for å nå nullvisjonen.

- Utviklinga vi ser i nedgangen i tal trafikkdrepne er gledeleg. Men samstundes veit vi at for alle dei 87 som har omkome, sit det pårørande igjen som har opplevd eit stort tap. Mine tankar går til desse, seier samferdselsminister Jon-Ivar Nygård i ei pressemelding frå departementet.

Fleire omkomne i Vestland

Sjølv om dei nasjonale tala er positive, viser tala frå Statens vegvesen at trenden i dei to fylka Vestland og Troms og Finnmark er til det verre. I begge desse fylka omkom ti personar i trafikken i fjor, i mot seks personar i 2020.

Det er møte- og utforkøyringsulukker som dominerer biletet blant dei mest alvorlege ulukkene på norske vegar.

Alvorleg trafikkulukke i Matre: Scooter og bil krasja

Nullvisjon

At færre menneskeliv har gått tapt i trafikken for andre år på rad blir sett i samanheng med at det vert jobba målretta og effektivt med trafikktryggleik.

- Vi har fått tryggare køyretøy og meir effektive kontrollar, og ei satsing på utbygging og utbetring av vegnettet har hatt effekt. Dette trykket skal vi bidra til å halde oppe, held Nygård fram.

Sjølv om talet på dødsfall går ned, er ikkje trenden like gode for dei hardt skadde i trafikken. Nygård ser det difor som avgjerande å halde fokuset og innsatsen oppe i tryggleiksarbeidet framover. Visjonen det blir jobba mot er «ingen drepte eller hardt skadde i trafikken».

Katastrofe i sakte film

Vegdirektør i Statens vegvesen, Ingrid Dahl Hovland, understrekar bakteppet for nullvisjonen i ein kronikk:

- Vi fortset trenden nedover. Ser vi attende til tusenårsskiftet omkom 341 i trafikken. For eit tiår sidan var det om lag 200. I 1970 var dødstala seks gongar så høge som i dag. Sidan den gong har det blitt mange fleire bilar, og meir enn tre gongar så mange køyrde kilometer. 87 drepte er inga kvilepute, det er framleis ein katastrofe i sakte film. Men talet 87 er eit bevis på at visjon om null drepte og hardt skadde er mogleg å strekkje seg etter.

Vidare minner Hovland om at trafikktryggleik er ei folkerørsle, kor det er plass til alle. Ho peikar mellom anna på effektane ved å bruka bilbelte, å unngå køyring i påverknad av rus, samt ved å halde fartsgrensene.