Få dagar med mykje regn – elles veldig fint

I alle bygder falt det mindre regn i september i år enn i tilsvarande månad i fjor. Nedbørstoppen vart elles sjåande temmeleg annleis ut enn vanleg; Matre er ikkje topp tre, og Uskedalen var 0,1 millimeter frå å vera den våtaste bygda! Den enda opp med Omvikdalen på fyrste plass. Der vart det notert 230,5 millimeter med regn. Så kom altså Uskedalen med 230,4, føre Ølve med 226,5.

I motsett ende av skalaen var ting meir normalt, med Sæbøvik som klar vinnar. Der i garden vart det berre registrert 109,5 millimeter. Mauranger følgde eit godt stykke bak med 143,8, føre Valen med 157,5.

Blanda drops

Underlagsmaterialet viser tydeleg at nesten alt regnet falt ned den 4. september, samt perioden 9. til 12., og til slutt den 15. Til dømes tok Ølve i mot heile 78 millimeter den 11. september. Resten av månaden var jamt over tørr. Det gav 18 nedbørsfrie døger både på Hatlestrand og i Omvikdalen. Trass i at Matre opplevde relativt lite regn, fekk bygda berre fem opplette dagar.

Hittil i år er statusen litt blanda drops. På dei fleste stader har 2024 registrert meir nedbør enn i fjor, men differansane er små. Hatlestrand og Mauranger skil seg ut ved at 2023 er våtast.

Historisk sett tronar september 1998 som den tørraste. På Husnes falt det då så lite som 65,7 millimeter. 1975 er våtast med 446,8 millimeter.

Tropedag

Temperaturane nådde høgt opp den fyrste veka. Alle bygder strekte seg over 24 grader. Høgast kom Matre med fantastiske 28 grader. Mot slutten av månaden vart det i staden to dagar som ikkje ein gong greidde tosifra. Då sokk temperaturen heilt ned til 1,5 grader i Ølve.

«September starta ekstremt varmt, men ei kald avslutning gjer at vi endar 1,4 grader over normalen. Etter den fyrste veka av månaden låg september 4 grader over normalen. September 2024 vart den 7. varmaste septembermånaden i ein måleserie som går tilbake til 1901», skriv Meteorologisk institutt.

I Norge vart det sett fem nye fylkesvarmerekordar og over 100 stasjonsrekordar for høgaste temperatur. I tillegg vart det for fyrste gong registrert tropedag i september i Norge. Det skjedde i Etne den 5. september, då ein nådde 30, 6 grader.

Målestasjonar

Oversikten viser noteringane til følgjande målestasjonar: Ølve (Henrik Barthel), Hatlestrand (Gunn-Bente Stølen), Mauranger (Tore Bondhus), Rosendal - Eik (Jan Eik), Rosendal - Vang (Kvinnherad Elektro), Omvikdalen (Birgit Mørkve Hjelmeland), Matre (SKL), Uskedalen (Kurt Haugland), Husnes (Hydro), Valen (Jarle Håvik) og Sæbøvik (Harald Særsten).

Snitt-temperatur totalt pr. september:

2024: 10,03

2023: 9,93

2022: 10,03

2021: 9,5

2020: 10,07

2019: 9,81

2018: 9,91

2017: 9,52

2016: 9,66

2015: 9,5

2014: 11,3

2013: 8,6

Kjelde: Kurt Haugland, Uskedalen