Eviny vil byggja 2,5 TWh – førebur to vindkraftprosjekt
Eviny er godt i gang med nye, store investeringar i fornybar energi og nett, og har nyleg sendt inn planinitiativ for to vindkraftanlegg og lansert dei fyrste vasskraftprosjekta for auka fleksibilitet i kraftproduksjonen.
Publisert
I ei pressemelding opplyser kraftgiganten Eviny at dei i tredje kvartal fekk eit underliggjande resultat på 67 millionar kroner, noko som er 43 mill. mindre enn same kvartal i fjor. Hovudårsaka er auka finanskostnader som følgje av investeringar i fornybar kraft.
Samstundes opplyser selskapet at dei har som mål å byggja 2,5 TWh ny fornybar energi og dobla nettkapasiteten dei neste ti åra.
Annonse
– Industrien på Vestlandet er tydeleg på behovet for meir fornybar energi til ein konkurransedyktig pris. Vi har no sendt inn planinitiativ for eit nytt vindkraftverk i Vindafjord og prosjektet Snøheia Industrikraft i Høyanger og Sunnfjord. Til saman kan desse prosjekta gje 1,3 TWh fornybar energi årleg, noko som tilsvarer straumforbruket i 81.250 bustader. Dette skal skje på naturen sine premiss og i tett dialog med lokalsamfunna, seier konsernsjef Ragnhild Janbu Fresvik i pressemeldinga.
Pumpekraftverk
Ho legg til at Eviny i år investerer opp mot éin milliard kroner for å vedlikehalda og styrka nettkapasiteten i regionen.
– Og vi har planar for å auka investeringane ytterlegare framover i tråd med behova vi ser for industri og næringsliv i regionen, understrekar Fresvik.
Annonse
Eviny ser elles på å byggja fleire pumpekraftverk. Dette for å auka fleksibiliteten i kraftproduksjonen, slik at ein større del av produksjonen kan skje når behovet er størst, og dermed bidra til å jamna ut kraftprisane. I dag finst det berre ti pumpekraftverk i Norge, deriblant det som Eviny har i Modalen.
– Vi har nyleg informert kommunestyret i Samnanger om planar for eit pumpekraftverk ved Kvitingsvatnet. I øvre del av Samnangervassdraget har vi gode magasin for å flytte vatn opp og ned, slik at vi kan produsera når kraftbehovet er stort, og pumpa vatnet opp igjen når behovet er lite, fortel Fresvik.
