Eva Refvik (52) blir rektor ved Undarheim skule

Refvik starta på Undarheim skule i 2006, som leiar for SFO, og har seinare vore kontaktlærar, IKT-koordinator, inspektør, verksemdleiar og avdelingsleiar. Før ho tok lærarskulen og seinare rektorskule, jobba ho i landbruket.

Når Marie Elisabeth Kaldestad no takkar av som rektor på den største barneskulen i kommunen var det Refvik som fekk tilbod om jobben, noko ho har takka ja til.

– Kva tankar har du om ny skule og om å tiltre ei rektorstilling på dette tidspunktet i prosessen med ny skule?

– Heile personalet er involvert i korleis vi ønskjer den nye skulen skal bli. Vi har sett på teikningane og kome med tilbakemeldingar i høve korleis vi ønsker bygget. Fleire i personalet har vore på skulebesøk og sett på andre skulebygg, for å få idear og inspirasjon når vi kjem med innspel til Norconsult. Det er viktig for oss å få eit funksjonelt og godt skulebygg, og det er ei spanande tid å bli rektor på, svarar ho.

Gler seg

I samband med den nye jobben er det fleire ting Refvik gler seg til.

– Det er fleire ting, heile pakken. Eg trivast veldig godt på skulen med det daglege arbeidet med elevar og tilsette. Så er utviklingsarbeidet vårt veldig spanande, noko eg gler meg til å halde fram med, forklarar ho, og held fram:

– Det å vera med å bygge ny skule vil bli noko heilt nytt og det er spanande med nye ting, så her er det mykje eg ser fram til! Kort og godt alt arbeidet vi gjer for å nå målet vårt: Undarheim skule har ei inkluderande, tilpassa, fellesskapane og elev-aktiv undervisning som fremjar eit godt læringsmiljø og -utbyte.

Håpar på gode utfordringar

På spørsmål om kva utfordringane vil bli, meiner ho det er vanskeleg å seie.

– Vi har tydleg sett korleis situasjonen i verda påverkar oss. Hadde eg fått dette spørsmålet for fire år sidan, så hadde ikkje korona vore det eg tenkte ville bli utfordrande, men sånn vart det. Pandemien er ikkje over ute i verda og det er krig i Ukraina. Vi veit lite om korleis dette vil påverke oss her i Norge og Kvinnherad framover. Så kva som blir mest utfordrande tør eg ikkje seie. Det er mykje som skjer, men eg er optimist og satsar på at vi får spanande og gode utfordringar framover, sluttar ho.