Ettertrakta kloke hovud

Torsdag kveld vart det for fyrste gong skipa til førjulssamling for studentar og lærlingar i Folgefonnsenteret i Rosendal. Arrangørar var Kvinnherad kommune og Kvinnherad næringsservice, i samarbeid med Bu i Sunnhordland. Åtte-ni bedrifter og 30 unge vaksne møtte fram. Ein av utstillarane var Ølve industrier.

– Vi må jo visa oss fram så folk ser kva vi held på med. Og så er vi på jakt etter fleire tilsette, fortalde produksjonssjef Jan Magnus Aasen.

Bedrifta har for tida behov for både automasjonsingeniør og maskiningeniør.

– Får vi tak i ein som er saman med ein sjukepleiar, så dekker vi også Alderspensjonatet. Det er det vi ynskjer, å få familiar til å flytta til bygda, la han til.

Ølve industrier har no 34 tilsette.

– I utgangspunktet treng vi å tilsetja to personar til. Men vi har tradisjon for at viss gode søkjarar dukkar opp, så er vi ikkje vanskelege å be. Vi har mykje å gjera framover, smilte dagleg leiar Steinar Bjørkelund.

Angrar ikkje

Hydro Husnes stilte med ein relativt ung trio. Benjamin Hus Ripel har jobba på aluminiumsverket heilt sidan han var 16 år, noko som i dag betyr 13 års erfaring. Han er no fagleiar køyretøy.

– Vi ynskjer å koma i kontakt med ungdomane, gjerne med dei som har fagkompetanse. Vi ser til dømes etter kloke hovud som har gått på universitet. Dei kan koma til oss rett etter fullført utdanning, sa han, og trekte fram fagområde som automasjon og mekanikk. Verket, som har nærare 400 tilsette, treng også ferievikarar.

– Studentane må gjerne ta seg ein sommarjobb så dei kan bli kjende med oss, og læra korleis vi produserer grønt aluminium, smilte Ripel.

Med seg hadde han Alette Eide Strømberg. Ho starta som lærling for 2,5 år sidan, og er no fast tilsett som operatør i elektrolysen. Anne Kristin Smeby har berre jobba hjå Hydro Husnes i 3 månader. Ho flytta frå Oslo til Kvinnherad nettopp for denne stillinga.

– Eg angrar ikkje enno, smilte den nyutdanna sivilingeniøren.

– Eg studerte kjemi, noko som er kjemperelevant for Hydro, opplyste ho.

Andre bedrifter som hadde stand, var Kvinnherad kommune, SKL, Wattn, Palfinger Marine, Norconsult og iteam.

Heimekjær

Ei av dei som har jobba med arrangementet, er Siri Rusten, avtroppande personalkonsulent i Kvinnherad kommune. Ho kunne seia seg godt nøgd med responsen.

– Vi visste ikkje kor mange som ville koma. Det kunne koma fem eller femti. No er det 30 her, og det må vi vera nøgde med. Ungdomane vi har snakka med, er veldig takknemlege for at vi arrangerer noko slikt. Eg håpar denne førjulssamlinga blir ein tradisjon, sa ho.

Blant dei som treivst på møtet, var Marit Opsanger-Tveit frå Valen og Emma Synnøve Skeie Olsen frå Omvikdalen. Begge er til vanleg studentar ved Universitetet i Bergen; fyrstnemnde på geografi, Emma Synnøve på ernæring.

– Veldig kjekt arrangement. Det er greitt å få vita kva som er her i kommunen, sa Marit.

– Kan du tenkja deg å flytta attende til Kvinnherad?

– Eg er veldig heimekjær. Såleis hadde det vore kjekt om det finst eit tilbod for meg her, svarte ho.

For Emma Synnøve er ikkje Kvinnherad øvst på lista.

– Ikkje med det fyrste, men kanskje etter kvart, analyserte ho.

Variasjon

Samlinga baud også på ei fellesavdeling i auditoriet. Der vart det vist film frå Halsnøy dokk og BKK, KNS ung presenterte seg, og Marianne Helvik i BKK fortalde om korleis ho hadde opplevd å flytta heim. Ordførar Vegard Bjørnevik var også til stades, og bar fram ei helsing.

– Fantastisk kjekt å sjå så mange som vil koma heim til Kvinnherad. Når vi ser dette oppmøtet og full sal, så veit at dette vil vi gjera igjen, smilte han.

– Eg er utruleg stolt over næringsvariasjonen i Kvinnherad. Du kan jobba i svært mange yrke i Kvinnherad. Men vi må ha ein plass å bu til dåke, sa han, og opplyste at i kommunen sin økonomiplan er det sett av i alt 70 millionar kroner til bustadutvikling dei neste fire åra.