Etterspør strakstiltak mellom Børneset og Myhresvingen

Trafikksikringsgruppa har sendt brev til Vestland fylkeskommune, kor dei undrar på korleis det ligg an med midlar til å trygga strekninga mellom Uskedal bru og Myhresvingen sør for Børneset, ei strekning som mellom anna fungerer som skulevegen til fleire av barna i bygda.

Bakgrunnen for brevet, som vart sendt 11. oktober, er eit møte som vart halde i mars.

«I dette møtet fekk trafikksikringsgruppa i oppgåve å senda inn 5 punkt som vi meiner er dei farlegaste punkta langs denne vegstrekka, og som skulle prioriterast utbetra med midlar sett av til strakstiltak. Dette vart sendt inn den 26. mars 2022, og vi ynskjer no ein status på kor saka står pr. dags dato», skriv dei i brevet.

Trafikksikringsgruppa ynskjer samstundes å få ei oppdatering på kvar prosjektet ligg på prioriteringslista til Regional trafikksikringsplan, og like eins i forhold til Kvinnheradpakken.

Uansett fram i tid

Kvinnherad kommune har valt å koma med eit svar (datert 19.10.22), sjølv om brevet er tiltenkt fylkeskommunen.

Kommunen beklagar at tiltaket ikkje er prioritert i Kvinnheradpakken, og viser til at finansieringa difor må koma frå andre ordningar. Truleg kan ein gang- og sykkelveg på denne strekninga bli ein del av ein Kvinnheradpakke 2.

«Ei utbygging må likevel skje gjennom reguleringsplan, noko som betyr at tiltaket uansett vil ligga ei stund fram i tid. Me ber såleis om forståing for at det frå kommunen si side no ikkje er mogleg å gje noko estimat for kva tid ei utbygging i så fall kan gjennomførast», skriv kommunen i sitt svar.

Hastar

Trafikksikringsgruppa meiner det særskilt hastar å setje inn tiltak i området frå Børnes til og med Myhresvingen.

«Dette skal vera skuleveg for born i småskulen, men slik det er no kan den ikkje nyttast på grunn av at det er for farleg for mjuke trafikantar å ferdast langs denne strekninga. Kan òg nemna at ein skuleelev må både klyve og klatra for å komma seg til og frå skulen», argumenterer dei i brevet til fylket.

Dette poenget tek kommunen òg tak i i svarbrevet til trafikksikringsgruppa:

«Kommunen har i dialog med fylkeskommunen og Skyss prøvd å finna ei løysing for forsvarleg skuleskyss for eleven som er nemnd i vedlegget til brevet. Me ventar for tida på ei avklaring av kva løysing som eventuelt kan godkjennast.»