Etterlyser svar i tannlegesaka: - Det må vera lettare å ta ein tannlege til Rosendal enn 100 ungar til Husnes.

Per dags dato finnest det tre tannlegar i Rosendal. Den nye klinikken Fonna Tannklinikk, og Odd Kailen og Harald Hjelmeland som deler kontorfellesskap i bankbygget.

Mange har engasjert seg i saka, og ei av dei er Ingrid Skeie. Ho meiner at kommunen må nytta seg av moglegheitene som finnest i Rosendal, og gjera ein innsats for å få tannklinikken på plass igjen. Sjølv har ho fleire forslag.

– Fonna tannklinikk har allereie tilbydd seg å ta over tannhelsetenesta, då dei har god kapasitet. Bankbygget har fleire ledige lokalar ein kan leiga, og kanskje ein til og med kan ta over utstyr når Odd Kailen gjev seg? undrar ho.

Krev enorme ressursar

Pasientar må no til Husnes tannklinikk, og for mange er dette ei lang og tidkrevjande reise.

– Anten må foreldre ta seg fri frå jobb for å køyra ungane til Husnes, noko som kan ta ein halv dag, eller så må dei reisa med buss, som tar endå lenger tid. Og sjølv om ein buss treff rett eine vegen, er det ikkje sikkert det treff andre vegen, seier Skeie, og legg til;

– Både bussturen og sjølve tannlegebesøket kan vera skummelt for små barn å gjere aleine, og det er godt med ei hand å halde i. Så både foreldre og barn må ta seg ein del fri.

Mange eldre bur på eller har krav på hjelp frå Rosendalstunet, og då må dei tilsette bruka mykje tid på å få ein brukar til tannlegen.

– Det må kanskje tingast taxi, og ein må ha med følgje. Det er enormt ressurskrevjande om ein skal fram og tilbake til Husnes på tannlegetimar, seier Skeie og legg til;

– Det må vera lettare å flytta ein tannlege til Rosendal enn å flytta 100 ungar og 200 eldre til Husnes.

Ikkje prioritet

Vestland fylkeskommune meiner å ha sendt eit brev til ordføraren. Grenda finn ikkje eit slikt brev verken på Kvinnherad kommune eller Vestland Fylkeskommune sine postlister.

Det siste vi finn er ein saksprotokoll frå Fylkesutvalet der Marthe Hammer (SV) fremmer eit forslag om å behalda vedteke klinikkstruktur og be administrasjonen gå i dialog med Kvinnherad Kommune om å finna passande lokal i Rosendal.

Dette vart samrøystes vedteke. Men vi finn ingen kommunikasjon om temaet mellom Vestland fylkeskommune og Kvinnherad kommune etter dette.

Etter at Grenda tok kontakt med gruppeleiar i SP Sigrid Brattabø Handegard i desember, tok ho opp igjen temaet i Fylkesutvalet den 4.januar. Ho var ikkje heilt nøgd med svaret ho fekk.

– Eg har ikkje fått eit klart svar på om kommunen har synleggjort alternativ til plassering av tannklinikk. Det kan synast som om verken kommunen eller fylkeskommunen har dette som ei prioritert sak å finna ei løysing på. Det synes eg er synd for dei som er avhengig av tilbodet, skreiv ho i ein e-post til Grenda.

I møteprotokollen frå Fylkesutvalet kan vi lesa følgjande;

«Fylkesutvalet vedtok 12.04.2023 at det skal leggast fram politisk sak som omhandlar tannlegetilbodet i Rosendal. Fylkestannlegen tok kontakt per e-post med Kvinnherad kommune i juni 2023 og har spurt om dei har forslag til lokale der dei meiner ein tannklinikk kan lokaliserast.

Fylkestannlegen vart kontakta av eigedomsavdelinga frå kommunen hausten 2023 om kva slags lokale tannhelsetenesta er ute etter. Tannhelsetenesta har hatt mange saker i haust og har ikkje kome så langt som ønska i denne saka på grunn av nødvendig prioriteringa i den store arbeidsmengda. Når tannhelsetenesta har fått fullført vurderinga, vil fylkesdirektøren komme tilbake med ei meldingssak om dette til fylkesutvalet».