Etterlyser livssynsnøytrale seremonirom

Eldrerådet bed kommunen gjera ei vurdering av livsnøytrale seremonirom til gravferder.

I eit brev til Kvinnherad kommune, bed leiar Vidar Ask i Eldrerådet kommunen leggja til rette, eller stilla til rådigheit eigna lokale som kan nyttast til livsnøytrale seremonirom.

– Befolkninga i Kvinnherad endrar seg i demografi og i tru og livssyn. Talet på personar med anna livssyn enn den norske kyrkja er aukande. For desse gruppene finst det i dag ingen særskilde seremonirom for gravferder. Pårørande, som har ansvar for gravferda, ynskjer tilgang til livssynsnøytrale seremonirom. Å ordna med lokalitetar i privat regi kan vera ei utfordring for dei pårørande i ei elles krevjande tid etter dødsfall, står det å lesa i brevet frå eldrerådet.

Eldrerådet peikar på at poenget med slike lokalar er at dei er fleksible og kan tilpassast alle religionar og livssyn.

– Og imøtekoma ei meir mangfaldig befolkning. Vi har mange kyrkje i kommunen, men det er ikkje alle som ynskjer dei som seremonirom, skriv eldrerådet og held fram:

– Vi bed kommunen gjera ei vurdering av livssynsnøytrale seremonirom. Gjerne leggja til rette, eller stilla til rådigheit eigna lokale i kommunal regi. Romma må bera preg av verdigheita og ha enkel tilkomst for kiste.