Etterlyser kreftkoordinator i 100 prosent

Det skriv Astri Måkestad og Bente Haugen frå Kreftomsorg Kvinnherad i brev til Kvinnherad kommune. Kvinnene har vore blant pådrivarane for at det vart politisk vedtak om å ha kreftkoordinator i 100 prosent stilling.

– Vi er no blitt kjent med at det er kreftkoordinator i 80 % stilling. Dette er ikkje i tråd med det som vart vedteke av Kvinnherad kommunestyre i budsjett 2023. Vi finn det derfor rett å stilla spørsmål kvifor praksis ikkje er i samsvar med vedtak? Er politikarane kjent med at vedtaket om 100% stilling ikkje er praktisert/gjennomført? spør dei i brevet.

Om kreftkoordinator ikkje kan ha full stilling, meiner Måkestad og Haugen at det må vera mogleg å få ei ordning med at andre fyller resten av stillinga.

– Det kan t.d. vera ei merkantil stilling som avlastar kreftkoordinatoren i rapporteringsarbeid og planskriving, foreslår dei, og slår fast at slik det er no, får kreftramma eit dårlegare tilbod enn lova og vedteke.

Stillingsprosenten til kreftkoordinatoren er inne som eit verbalpunkt i kommunebudsjettet for 2023.

– Stillinga som kreftkoordinator i Kvinnherad kommune vert auka frå 20% til 100% stilling. Kommunestyret føreset at den som vert tilsett i stillinga har kompetanse i kreftomsorg. Brukarane, representert ved Kreftforeininga bør takast med på råd når det gjeld organiseringa av funksjonen. Den nye organiseringa trer i kraft snarast og seinast innan utgangen av mai 2023, står det i punktet.