Etterlyser gang- og sykkelveg

I kommunen sin trafikksikringsplan står det at gang- og sykkelveg frå Lundssvingane til brua i Dimmelsvik har høg prioritet. No krev foreldre og barn at dette prosjektet vert løfta fram.

I tysdagens Grenda hadde FAU ved Omvikdalen skule eit lesarinnlegg om trafikksikring i Dimmelsvik. Same ettermiddag stilte skulekameratar, elevar frå 1. til 6. klasse, FAU-medlemer, foreldre, besteforeldre og bygdefolk opp for å synleggjera kva som er problemet.

Frå Best-stasjonen og bort til brua er det korkje fortau eller gang- og sykkelveg. Den stunda vi er samla der, fyk det små og store køyretøy forbi meir eller mindre kontinuerleg.

– I kommunen sin trafikksikringsplan, som gjeld fram til 2020, står det at gang- og sykkelveg heilt fram til brua i Dimmelsvik har høg prioritet. No er det på tide at ein prioriterer dette prosjektet. For meg er det uforståeleg at dei ikkje tek det i same slengen som Lundsneset, men det er vel pengane det står på, seier Line Sundal.

 

Betalar sjølve

Hennar son Joakim skal til hausten byrja i 4. klasse ved Omvikdalen skule. Men frå 3. klasse av har elevane kun rett til vinterskyss, det vil seia frå november til februar, og berre om morgonen. Line vågar ikkje senda Joakim til skulen korkje til fots eller på sykkel, og har difor valt å betala skyss sjølv, noko som kostar 38 kroner dagen med bussen.

– Å ha ungane gåande her med dette trafikkbiletet, er heilt uaktuelt. Trafikken har dessutan auka veldig dei siste åra. Og dei som køyrer over brua har det stort sett veldig travelt, fortel ho.

Også svigerinna Elise Sundal og Mariann Musland Søllesvik betalar skyss for sine ungar.

Kravet deira er at det må koma gang- og sykkelveg frå bensinstasjonen til brua, og så byggjast ei eiga gangbru ved sida av, slik som i Uskedalen og på Seim.

– Det er med livet som innsats å gå over brua, vurderer Line Sundal.

 

Flytta til Rosendal

Elise opplyser at dei har lagt fram problemet for ordføraren. Han kom med eit innspel til foreldra om å vurdera å flytta ungane til skulen i Rosendal, for inn dit er vegen trygg.

– Hadde ikkje ungane allereie ha byrja i Omvikdalen, så kunne eg ha tenkt på det. Men no må vi også ta omsyn til miljøet og kameratane, og vi ynskjer ikkje å bryta det opp, seier Elise.

Kommunen har elles stadfesta at det ikkje ligg føre planar om å laga gang- og sykkelveg i næraste framtid. Men gjengen frå Omvikdalen og omland bed no om at politikarane endrar på dette.

– Kvinnherad satsar jo på å bli ein trafikksikker kommune, og då bør dette prosjektet vera høgaktuelt, meiner Line Sundal.

– Bru og gang- og sykkelveg vil vera eit gode for heile bygda, slår Elise Sundal fast.